: విమాన ప్రయాణికులకు ఆఫర్లే ఆఫర్లు!
విమానయాన కంపెనీలు పోటీలు పడి మరీ ప్రయాణికులకు ఆఫర్లను ప్రకటించాయి. 500 రూపాయలకు వన్ వే టికెట్ ప్రకటించిన స్పెస్ జెట్ ఆఫర్ కు కస్టమర్ల నుంచి మంచి స్పందన వచ్చింది. దీంతో జెట్ ఎయిర్ వేస్, ఇండిగో సంస్థలు కూడా తగ్గింపు ధరలతో టిక్కెట్లను విక్రయించడంతో విమాన ప్రయాణికుల నుంచి మంచి రెస్పాన్స్ వచ్చింది. ఎయిరిండియా కూడా చవక ధరల టిక్కెట్లకు తెర లేపింది. ఏకంగా 100 రూపాయలకే టిక్కెట్లు బుక్ చేసుకోవచ్చని ప్రకటించడంతో... ప్రయాణికులు ఒక్కసారిగా సైట్ ను లాగిన్ కావడంతో ఆ సైట్ ఒక్కసారిగా క్రాష్ అయింది. కొన్ని విమాన సంస్థల ఆఫర్లు ఆగస్టు నెలతో ముగిసిపోయాయి. స్పైస్ జెట్ సంస్థ వచ్చే ఏడాది ప్రయాణాలకు సంబంధించిన టిక్కెట్లను 499 రూపాయలకే అందిస్తామంటూ ఇచ్చిన ఆఫర్ 3వ తేదీతో ముగిసింది. దీనికి మంచి రెస్పాన్స్ రావడంతో స్పైస్ జెట్ ఆఫర్ కాలపరిమితిని 5వ తేదీ 23.59 గంటల వరకు పొడిగించింది. 2015 జనవరి 16 నుంచి అక్టోబరు 24 వరకు ప్రయాణించే వారికి ఈ ఆఫర్ వర్తిస్తుంది. బడ్జెట్ విమానయాన సంస్థ ఎయిర్ ఏషియా ఇండియా విమాన టిక్కెట్ ప్రారంభ ధరను 600 రూపాయలుగా ప్రకటించిన ఆఫర్ ఆగస్టు 31వ తేదీతో ముగిసింది. ఇప్పుడు ఎయిర్ ఏషియా ఇండియా మరో ఆఫర్ ను ప్రయాణికుల ముందుకు తీసుకువచ్చింది. అన్ని పన్నులు కలిపి వివిధ మార్గాల్లో ప్రయాణాలకు 1290 రూపాయలకే టిక్కెట్ అందిస్తోంది. ఈ టిక్కెట్లను ఈ నెల 7వ తేదీ వరకు బుక్ చేసుకోవచ్చు. డిసెంబరు 11వ తేదీ వరకు చేసే ప్రయాణాలకు ఈ ఆఫర్ వర్తిస్తుంది.
