: తొలి ఓవర్లోనే ఇంగ్లండ్ నవ్వింది... గంభీర్ గోల్డెన్ డకౌట్
భారత్ కు మరో అగ్ని పరీక్ష మొదలైనట్టే కనిపిస్తోంది. టాస్ గెలిచి ఫీల్డింగ్ ఎంచుకున్న తమ కెప్టెన్ నిర్ణయం సరైనదేనని నిరూపిస్తూ ఏస్ ఫాస్ట్ బౌలర్ జిమ్మీ ఆండర్స్ తొలి ఓవర్లోనే వికెట్ తీశాడు. తద్వారా జట్టులో ఆనందం నింపాడు. టీమిండియా ఓపెనర్ గౌతమ్ గంభీర్ (0) ఆండర్సన్ విసిరిన బ్యాక్ ఆఫ్ లెంగ్త్ బంతికి వికెట్ కీపర్ బట్లర్ కు క్యాచ్ ఇచ్చాడు. ఆడదామా? వదిలేయాలా? అన్న సందిగ్దంలోనే గౌతీ బ్యాట్ ముందుకు జరపడంతో బంతి సుతారంగా రాసుకుంటూ వెళ్ళి కీపర్ గ్లోవ్స్ లో వాలింది. ఇక, ఆశాకిరణం పుజారా (4) సైతం స్వల్ప స్కోరుకే వెనుదిరిగాడు. బ్రాడ్ కు ఈ వికెట్ దక్కింది. ఈ పొడగరి పేసర్ విసిరిన బంతి పుజారా బ్యాట్, ప్యాడ్ కు మధ్య ఖాళీలోంచి వెళ్ళి బెయిల్స్ ను ఎగరగొట్టింది. దీంతో భారత్ రెండో వికెట్ కోల్పోయింది. ప్రస్తుతం భారత్ స్కోరు 2 వికెట్లకు 12 పరుగులు కాగా, ఓపెనర్ మురళీ విజయ్ (8*) జతగా, విరాట్ కోహ్లీ (0*) క్రీజులో ఉన్నాడు.
