: 15 అడుగుల ఆ తాచుపాము గర్భిణి... మాకొద్దు బాబోయ్!
తూర్పుగోదావరి జిల్లా రంపచోడవరం ప్రాంతంలో దొరికిన తాచుపామును తాము సాకలేమని విశాఖ జూ అధికారులు చేతులెత్తేశారు. 15 అడుగుల తాచుపాము ఒకదాన్ని రంపచోడవరం ప్రాంతంలో ఈ నెల 13వ తేదీన పట్టుకున్నారు. నాలుగు గంటల పాటు శ్రమించి మరీ పట్టుకున్న ఆ పామును అటవీ శాఖాధికారులు అతి కష్టం మీద విశాఖ జూకు తరలించారు. అయితే, అక్కడ దాన్ని పరిశీలించిన వైద్యులు... ఆ పాము గర్భిణి అని గుర్తించారు. ఇది చాలా ఎక్కువ సంఖ్యలో పిల్లలను పెట్టే అవకాశం ఉందని, అవి జూలో ఉన్న ఇతర జంతువులకు ప్రమాదం కావచ్చని వైద్యులు చెప్పారు. అలాగే, ఈ పాము, పిల్లలను సాకడం కూడా చాలా ఖర్చుతో కూడుకున్న వ్యవహారమని జూ అధికారులు చెప్పారు.
దీంతో అత్యంత విషపూరితమైన ఈ తాచుపామును విశాఖ, తూర్పుగోదావరి ఏజెన్సీల మధ్యలో ఉన్న దట్టమైన అడవుల్లోకి తీసుకెళ్లి వదిలేశారు. రంపచోడవరం ప్రాంతంలో ఉన్న ఓ ఇంటి ఆవరణలోకి ఈ తాచుపాము ప్రవేశించగా, అటవీ శాఖాధికారులు దీన్ని పట్టుకోగలిగారు. సాధారణంగా ఇంత పెద్ద తాచులు ఆస్ట్రేలియాలో కనపడతాయని, బహుశా చెట్లు నరికివేయడం వల్లే ఇది నివాస ప్రాంతాల్లోకి వచ్చి ఉంటుందని అధికారులు చెప్పారు. ప్రపంచంలో అత్యంత పొడవైన, అత్యంత విష పూరితమైనది తాచుపామే.
