: ఇంట్లో కూర్చుని టీ తాగడం కాదు... వెళ్లి ఓటేయండి: కపిల్ శర్మ
సెలవు దొరికింది కదా అని హాయిగా ఇంట్లో కూర్చుని టీవీ చూస్తూ టీలు తాగడం సరికాదని... వెళ్లి ఓట్లు వేయాలని ప్రముఖ కమెడియన్ కపిల్ శర్మ ప్రజలకు పిలుపునిచ్చాడు. సుస్థిరమైన ప్రభుత్వం రావాలంటే ఓటు హక్కు ఉన్న ప్రతి ఒక్కరూ వెళ్లి ఓటు వేయాలని కపిల్ సూచించాడు. తెల్ల కుర్తా పైజమా, గులాబీ రంగు నెహ్రూ జాకెట్ ధరించిన కపిల్... ఢిల్లీలో ఎన్నికల కమిషన్ తరపున ఓటరు అవగాహన కార్యక్రమం నిర్వహించాడు.
‘కామెడీ నైట్స్ విత్ కపిల్’ టీవీ షోతో బాగా పాప్యులర్ అయిన కపిల్ ను ఎన్నికల కమిషన్ తమ బ్రాండ్ అంబాసిడర్ గా నియమించుకుంది. నిజానికి తనకు కూడా ఓటరు గుర్తింపు కార్డు లేదని, తాను బ్రాండ్ అంబాసిడర్ కాబట్టి, ప్రత్యేక కేసుగా భావించి ఓటరు ఐడీని ఇవ్వాలని ఈసీని కపిల్ కోరాడు. క్రికెటర్ విరాట్ కోహ్లి, బాలీవుడ్ నటి సోహా అలీ ఖాన్ తదితరులు ఎన్నికల కమిషన్ తరపున ప్రచారం చేస్తున్నారు.
