: దీంతో సరైన ఆహారాన్ని తినవచ్చు
మీరు మీ శరీరానికి అవసరమైనంత కేలరీలను అందించగల ఆహారాన్ని తీసుకుంటున్నారా...? ఈ విషయంలో ఎవరూ సరిగా సమాధానం చెప్పలేరు. ఒక వ్యక్తి రోజుకు ఇన్ని కేలరీల ఆహారాన్ని తీసుకోవాలని నిపుణులు చెబుతుంటారు. కానీ ఇలా కేలరీలను లెక్కించి తినగలిగేంత సమయం, అవకాశం ఎవరికీ ఉండదు. అలాకాకుండా అసలు మనం ఏం తింటున్నాము... అందులో ఏవైనా తినగూడని పదార్ధాలున్నాయా... మనం తినే ఆహారం నుండి ఎంతమేర శక్తి, కేలరీలు మనకు లభిస్తాయి? వంటి వివరాలను మనకు అందించేందుకు ఒక కొత్తరకం పరికరం రానుంది. ఈ పరికరాన్ని ఇలా ఆహారంపై తిప్పితే చాలట... అది మనం తినే ఆహారంలో ఉండే క్యాలరీలను, అలాగే అందులో మనకు అలర్జీని కలిగించే కారకాలు ఏవైనా ఉంటే వాటి గురించి, ఒకవేళ పొరబాటున అందులో పురుగుమందు అవశేషాలుంటే వాటి గురించి మనకు ఇట్టే చెప్పేస్తుందట.
టొరంటోకు చెందిన పరిశోధకులు ఒక కొత్తరకం స్కానర్‌ను తయారుచేశారు. ఈ స్కానర్‌ పేరు టెల్‌స్పెక్‌. బుల్లి మౌస్‌లాంటి ఈ స్కానర్‌ను మన ఆహార పళ్లెంపై పెట్టి అలా తిప్పితే చాలు మన పళ్లెంలోని ఆహారం చక్కగా స్కానింగ్‌ అయిపోతుంది. ఈ పరికరం నుండి తక్కువ శక్తిగల లేజర్‌ ఆహారంపై పడుతుంది. లేజర్‌ పడగానే ప్రతిబింబించే కాంతి తరంగాలను ఇది రామన్‌ సెక్ట్రోమీటర్‌ సాయంతో పసిగడుతుంది. ఈ సమాచారాన్ని ఆన్‌లైన్‌లో ఉండే డేటాబేస్‌కు పంపిస్తుంది. దీంతో అక్కడ విశ్లేషణ పూర్తయి దానికి సంబంధించిన వివరాలను ఒక అప్లికేషన్‌ ద్వారా మీ స్మార్ట్‌ఫోన్‌కు అందుతాయి.
ఈ స్కానర్‌తో మన ఆహారపదార్ధాలను 97.7 శాతం కచ్చితత్వంతో స్కాన్‌ చేయవచ్చట. ఇప్పటి వరకూ దాదాపు మూడు వేల రకాల ఆహారపదార్ధాలను స్కాన్‌ చేసేలాగా డాటాబేస్‌ను రూపొందించామని, ఇది దాదాపుగా అన్ని రకాల ఆహార పదార్ధాలను స్కాన్‌ చేయగలదని దీన్ని తయారుచేసిన ఇసాబెల్‌ హాఫ్‌మన్‌, స్టీఫెన్‌ వాట్సన్‌లు చెబుతున్నారు. వచ్చే ఏడాది ఆగస్టులో మార్కెట్‌లోకి విడుదల చేయనున్న ఈ స్కానర్‌ ధర కేవలం రూ.19,752 మాత్రమే.
