: నిప్పులు చిమ్ముతూ, నింగికెగసిన మార్స్ ఆర్బిటర్
నరాలు తెగే ఉత్కంఠ మధ్య ఎలాంటి ఆటంకాలు లేకుండా 'మార్స్ ఆర్బిటర్' నిప్పులు చిమ్ముతూ, నింగికెగసింది. సరిగ్గా మధ్యాహ్నం 2 గంటల 38 నిమిషాలకు పీఎస్ఎల్వీ సి-25 రాకెట్ ద్వారా అంగారకుడి వైపు బయలుదేరింది. ప్రపంచ దేశాలన్నీ ఆసక్తిగా గమనిస్తున్న శుభవేళ భారత శాస్త్రవేత్తలు బృహత్తర కార్యక్రమాన్ని విజయవంతంగా నిర్వహించారు. లాంచ్ సక్సెస్ కావడంతో ఇస్రోలో ఆనందం వెల్లివిరుస్తోంది. మరో గంటలో ఇది కక్ష్యలోకి ప్రవేశిస్తుంది.
ఈ మిషన్ కు రెండు రోజుల ముందు భారత్ శాస్త్రవేత్తలు కౌంట్ డౌన్ ప్రారంభించారు . శ్రీహరి కోటలో ఉత్కంఠభరిత వాతావరణం మధ్య ఉపగ్రహ ప్రయోగానికి ముందు ఐదు సార్లు గాలి వాటం గురించి బెలూన్లను వదిలారు. మార్స్ ఆర్బిటర్ ఉపగ్రహం సూపర్ కంప్యూటర్ ఆధీనంలో పని చేయనుంది. ఈ ప్రయోగంతో భారత్ అంతరిక్ష ప్రయోగాల్లో మరో కీలక ముందడుగు వేసింది. అగ్రరాజ్యాల సరసన సగర్వంతో నిలబడింది.
