Nagashourya: 'కృష్ణ వ్రింద విహారి' రిలీజ్ డేట్ ఖరారు!

నాగశౌర్య కొంతకాలంగా సరైన హిట్ కోసం వెయిట్ చేస్తున్నాడు. ఈ సారి తప్పకుండా హిట్ కొట్టాలనే పట్టుదలతో ఆయన చేసిన సినిమానే 'కృష్ణ వ్రింద విహారి'. సొంత బ్యానర్ 'ఐరా క్రియేషన్స్' పై నిర్మితమైన ఈ సినిమాకి అనీష్ కృష్ణ దర్శకత్వం వహించాడు. ఈ సినిమాతో తెలుగు తెరకి కథానాయికగా షిర్లే సెటియా పరిచయమవుతోంది. 

మే 20వ తేదీనే ఈ సినిమాను విడుదల చేయాలనుకున్నారు. ఆ డేట్ తోనే ప్రమోషన్స్ చేస్తూ వచ్చారుగానీ, పరిస్థితులు అనుకూలించకపోవడం వలన విడుదల చేయలేదు. తాజాగా కొత్త రిలీజ్ డేట్ ను ప్రకటించారు. సెప్టెంబర్ 23వ తేదీన ఈ సినిమాను విడుదల చేయనున్నట్టు చెబుతూ, అందుకు సంబంధించిన పోస్టర్ ను వదిలారు.  

మహతి స్వరసాగర్ సంగీతాన్ని సమకూర్చిన ఈ సినిమాలో రాధిక కీలకమైన పాత్రను పోషించింది. వెన్నెల కిశోర్ .. రాహుల్ రామకృష్ణ ముఖ్యమైన పాత్రలలో కనిపించనున్నారు. టైటిల్ ను బట్టి ఇది ట్రయాంగిల్ లవ్ స్టోరీ అనే విషయం తెలుస్తోంది. ఈ సినిమా ఎలాంటి రిజల్టును రాబడుతుందో చూడాలి.