Samantha: కశ్మీర్లో షూటింగుకి విజయ్ దేవరకొండ - సమంత రెడీ!

విజయ్ దేవరకొండ హీరోగా శివ నిర్వాణ దర్శకత్వంలో ఒక సినిమా రూపొందనుందనే టాక్ కొన్ని రోజులుగా వినిపిస్తోంది. 'లైగర్' సినిమా కారణంగా ఆలస్యమవుతూ వచ్చిన ఈ సినిమా, ఇక ఇప్పుడు పట్టాలెక్కుతోంది. ఈ సినిమాలో కథానాయికగా సమంతను తీసుకోనున్నట్టుగా వార్తలు వచ్చాయి. ఆమెనే ఖరారు చేశారనే టాక్ ఇప్పుడు వినిపిస్తోంది.

ఈ నెల 21వ తేదీన ఈ సినిమాను లాంచ్ చేయనున్నట్టుగా చెబుతున్నారు. ఆ రోజు ఉదయాన్నే పూజా కార్యక్రమాలు మొదలవుతాయని అంటున్నారు. ఈ నెల 23వ తేదీ నుంచి రెగ్యులర్ షూటింగును స్టార్ట్ చేయనున్నారు. ఫస్టు షెడ్యూల్ ను కశ్మీర్ లో ప్లాన్ చేసినట్టుగా తెలుస్తోంది. నాయక, నాయికల మధ్య అక్కడ కొన్ని ముఖ్యమైన సన్నివేశాలను చిత్రీకరించనున్నారట. 

ప్రేమకథల స్పెషలిస్టుగా శివ నిర్వాణకి మంచి పేరుంది. ఈ సినిమా కూడా ప్రేమకథా నేపథ్యంలోనే కొనసాగుతుందట. సోల్జర్ గా విజయ్ దేవరకొండ కనిపించనున్న ఈ సినిమాలో సమంత పాత్ర చాలా డిఫరెంట్ గా ఉంటుందని అంటున్నారు.  'మజిలీ' తరువాత శివ నిర్వాణ దర్శకత్వంలో సమంత  చేస్తున్న సినిమా కావడంతో, అందరిలో ఆసక్తి నెలకొంది.