Pavan Kalyan: పవన్ కాదంటే 'వకీల్ సాబ్' ఆ హీరోతో చేసేవాడట!

పవన్ కల్యాణ్ కథానాయకుడిగా వేణు శ్రీరామ్ దర్శకత్వంలో 'వకీల్ సాబ్' సినిమా రూపొందింది. ఒక బలహీనురాలిని కాపాడటం కోసం ఒక బలవంతుడితో పోరాడే వకీల్ కథ ఇది. ఈ సినిమాలో అంజలి .. నివేదా థామస్ .. అనన్య ముఖ్యమైన పాత్రలను పోషించారు. 'దిల్' రాజు నిర్మించిన ఈ సినిమా, రేపు ప్రేక్షకుల ముందుకు రానుంది. దీంతో ఒక వైపున వేణు శ్రీరామ్, మరో వైపున అంజలి .. అనన్య ఈ సినిమా ప్రమోషన్స్ లో బిజీగా ఉన్నారు. తాజా ఇంటర్వ్యూలో ఈ సినిమాకి సంబంధించిన అనేక విషయాలను వేణు శ్రీరామ్ పంచుకున్నాడు.

"మొదటి నుంచి కూడా నేను పవన్ కల్యాణ్ అభిమానిని. ఆయన అంటే నాకు చాలా ఇష్టం. ఈ విషయం 'దిల్' రాజుగారికి తెలుసు. అందువలన నేను మరింత కేర్ తీసుకుని చేస్తానని ఆయన నాకు ఈ ప్రాజెక్టును అప్పగించారు" అని చెప్పాడు. ఒకవేళ పవన్ కల్యాణ్ గారు ఈ సినిమా చేయనని అంటే, అప్పుడు ఈ కథ కోసం ఏ హీరోను ఎంచుకునేవారు? అనే ప్రశ్నకు ఆయన స్పందిస్తూ, "నాగార్జున గారిని ఎంచుకునేవాడిని .. ఎందుకంటే ప్రయోగాలు చేయడానికి ఆయన ఎప్పుడూ సిద్ధంగా ఉంటారు" అని చెప్పుకొచ్చాడు.