: రంగంలోకి దిగిన 'పింక్ హోయ్సళ'... బెంగళూరు రోమియోలకు చెక్!
ఆకతాయిలకు అడ్డుకట్ట వేసి, యువతులకు అండగా ఉండాలన్న లక్ష్యంతో కన్నడ సర్కారు ప్రారంభించిన 'పింక్ హోయ్సళ' తన పనిని ప్రారంభించింది. ఆపదలో ఉన్న మహిళలను రక్షించడం, రోమియోల పనిబట్టడమే ఈ బృందం ప్రధాన కర్తవ్యం. ఓ అమ్మాయిని తన బైక్ ఎక్కాలంటూ వేధిస్తున్న దీపక్ అనే యువకుడిని స్థానికులు ఇచ్చిన సమాచారంతో పింక్ హోయ్సళ టీమ్ అదుపులోకి తీసుకుంది. కొన్నాళ్ల క్రితం వరకూ ఓ యువతిని ప్రేమించిన దీపక్, ఆపై ఆమె తనను నిర్లక్ష్యం చేస్తోందని భావించి వేధింపులకు దిగాడు.
ఈ క్రమంలో ఆమె రోడ్డుపై వెళుతుండగా, బైకుతో వెంబడిస్తూ గొడవ పడ్డాడు. సమాచారం తెలుసుకున్న పోలీసులు అతడిని అరెస్ట్ చేసి కటకటాల వెనక్కు పంపారు. ఇక ఈ ప్రత్యేక బృందాలు రోడ్డుపై గస్తీ తిరుగుతూ అమ్మాయిలను వేధిస్తున్న ఆకతాయిలకు చెక్ పెట్టే పనిలో నిమగ్నమయ్యాయి. కాగా, పింక్ హోయ్సళ విడుదల చేసిన సురక్ష యాప్ ను వేలాది మంది డౌన్ లోడ్ చేసుకున్నారని కమాండ్ సెంటర్ పేర్కొంది.
