balaiah: నా ప్రేక్ష‌క దేవుళ్ల మ‌ధ్య‌లో కూర్చొని ఈ సినిమా ట్రైల‌ర్‌ను మొద‌టిసారిగా చూశా: బాల‌కృష్ణ‌

తాను న‌టించిన 100వ చిత్రం 'గౌత‌మిపుత్ర శాత‌క‌ర్ణి' సినిమా ట్రైలర్‌ విడుద‌ల అవుతున్న వేళ త‌న‌కు ఎంతో సంతోషంగా ఉంద‌ని సినీన‌టుడు బాల‌కృష్ణ అన్నారు. 'నా ప్రేక్ష‌క దేవుళ్ల మ‌ధ్య‌లో కూర్చొని ఈ సినిమా ట్రైల‌ర్‌ను మొద‌టిసారిగా చూశా'  అని ఆయన చెప్పారు. సినిమా ట్రైలర్ విడుద‌ల అయిన అనంత‌రం ఆయ‌న మాట్లాడుతూ.. ఇక్క‌డ‌కు వ‌చ్చి కోటి లింగాల స్వామిని ద‌ర్శ‌నం చేసుకొని, ఆ త‌రువాత‌ ట్రైల‌ర్‌ను లాంఛ్ చేశామ‌ని అన్నారు.  గౌత‌మి పుత్ర శాత‌క‌ర్ణి త‌ల్లి గౌత‌మి ఇదే జిల్లాలో పుట్టింద‌ని అన్నారు. ఆమెకు గౌత‌మి పుత్ర శాత‌క‌ర్ణి లాంటి గొప్ప రాజు జ‌న్మించాడ‌ని, అటువంటి గొప్ప వ్య‌క్తి పాత్ర‌లో న‌టిస్తున్నాన‌ని అన్నారు.

మ‌నది ఓ బ్ర‌హ్మాండ్‌మైన‌ చ‌రిత్ర అని బాలకృష్ణ అన్నారు. తెలుగువాడి పౌరుషాన్ని గౌత‌మిపుత్ర శాత‌క‌ర్ణి చాటిచెప్పార‌ని ఆయ‌న అన్నారు. నంద‌మూరి వార‌సుడిగా ఈ క‌థ‌ను చాటి చెప్ప‌డం తన ధ‌ర్మంగా భావించానని బాల‌య్య అన్నారు. త‌న‌ వందో సినిమాను ప్ర‌తిష్టాత్మ‌కంగా తెర‌కెక్కించామ‌ని, ద‌ర్శ‌కుడు క్రిష్‌ అద్భుతంగా ప‌నిచేశాడ‌ని అన్నారు.