Mohammed Shami: షమీ సూపర్ 'సెవెన్'... ఢిల్లీ, ముంబయి పోలీసుల మధ్య సరదా సంభాషణ

• వరల్డ్ కప్ లో వికెట్ల వీరుడిగా దూసుకుపోతున్న షమీ
• నిన్న న్యూజిలాండ్ పై సెమీస్ లో 7 వికెట్లతో రికార్డు
• ఫన్నీ ట్వీట్లతో ఆకట్టుకున్న ఢిల్లీ, ముంబయి పోలీస్ విభాగాలు

---

టీమిండియా ఏస్ పేసర్ మహ్మద్ షమీ వరల్డ్ కప్ వికెట్ల వేట సాగిస్తున్నాడు. బుధవారం నాడు న్యూజిలాండ్ తో జరిగిన సెమీఫైనల్లో షమీ 7 వికెట్లతో రికార్డు సృష్టించాడు. గెలుపు దిశగా వెళుతున్న న్యూజిలాండ్ కు కళ్లెం వేశాడు. కాగా, షమీ సూపర్ 'సెవెన్'పై ఢిల్లీ, ముంబయి పోలీసులు సోషల్ మీడియాలో సరదాగా సంభాషించుకున్నారు. పోలీసు పరిభాషలో సాగిన ఈ సంభాషణ నెటిజన్లను విశేషంగా ఆకట్టుకుంటోంది. 
ట్వీట్లు ఇలా సాగాయి...

ఢిల్లీ పోలీస్ విభాగం: ఈ రాత్రి షమీ సాగించిన దాడులకు అతడ్ని మీరు అరెస్ట్ చేయరనే అనుకుంటున్నాం. 
ముంబయి పోలీస్ విభాగం: లెక్కలేనన్ని హృదయాలను దొంగలించినందుకు అతడిపై మీరు అభియోగాలు మోపడం మర్చిపోయినట్టున్నారు. అతడితో పాటు మరో ఇద్దరు సహనిందితులు (కోహ్లీ, శ్రేయాస్ అయ్యర్)ల పేర్లను కూడా ఎఫ్ఐఆర్ లో చేర్చలేదు మీరు!
గమనిక: ప్రియమైన పౌరులారా... ఇది సరదా సంభాషణ మాత్రమే. రెండు డిపార్ట్ మెంట్లకు ఐపీసీ గురించి బాగా తెలుసు. మీలో మంచి హాస్య చతురత ఉందని నమ్ముతూ ఈ సంభాషణ చేశాం... అంటూ ముంబయి పోలీస్ విభాగం వివరణ ఇచ్చింది.