Google Pixel 6a: భారత్ లో లాంచ్ కానున్న గూగుల్ పిక్సల్ 6ఏ

• ఈ నెలాఖరున విడుదల కావచ్చన్న సమాచారం
• ధర రూ.40వేల లోపు ఉండే అవకాశం
• గూగుల్ నుంచి అధికారికంగా రాని ప్రకటన

---

గూగుల్ పిక్సల్ 6 సిరీస్ కోసం ఎదురు చూస్తున్న వారి నిరీక్షణ త్వరలోనే ఫలించనుంది. ఈ నెలాఖరులో గూగుల్ పిక్సల్ 6ఏ భారత మార్కెట్లోకి విడుదల అయ్యే అవకాశాలు ఉన్నాయి. ధర కూడా రూ.40,000 లోపు ఉంటుందని తెలుస్తోంది. పిక్సల్ 4ఏ తర్వాత గూగుల్ మరో ఫోన్ ను భారత మార్కెట్లోకి ఇంత వరకు తేలేదు. మధ్యలో పిక్సల్ 5 సిరీస్ ను గూగుల్ ఇతర మార్కెట్లలో విడుదల చేసినా, ఎందుకనో భారత్ మార్కెట్ కు పరిచయం చేయలేదు. 
ఇక ఇప్పుడు నేరుగా పిక్సల్ 6ఏను తీసుకురానుంది. గూగుల్ పిక్సల్ 6, 6 ప్రో ఫోన్లు లోగడే అమెరికాలో విడుదలయ్యాయి. పిక్సల్ 6ఏ ఫీచర్లు 6ను పోలి ఉంటాయి. ఇందులో గూగుల్ సొంత చిప్ అయిన టెన్సార్ ఉంటుంది. పిక్సల్ 6 మాదిరే డిజైన్ ఉంటుంది. 
టిప్ స్టర్ అంచనా ప్రకారం పిక్సల్ 6ఏ ధర భారత్ లో రూ.37,000గా ఉండొచ్చని తెలుస్తోంది. కానీ, విడుదల తేదీ, ధరలను ఇంత వరకు గూగుల్ అధికారికంగా ప్రకటించలేదు. ఈ నెలాఖరుకు వీటిని విడుదల చేయవచ్చని, ఫ్లిప్ కార్ట్ లో విక్రయాలు జరుగుతాయని తాజాగా సమాచారం బయటకు వచ్చింది. 6ఏను గూగుల్ కెనడా మార్కెట్లో విడుదల చేయగా, అక్కడ 599 కెనడా డాలర్ల ధర నిర్ణయించింది. బ్రిటన్ లో 399 పౌండ్లుగా నిర్ణయించింది.