వామ్మో.. వాటర్ ట్యాంక్లో పాముల ఫ్యామిలీ!
- హరిద్వార్లోని ఓ ఇంట్లో నీళ్ల ట్యాంక్లో పాము పిల్లలు కలకలం
- నీటి సరఫరా ఆగడంతో ట్యాంక్ తెరిచి చూసి షాకైన కుటుంబ సభ్యులు
- ట్యాంక్లో ఉన్న 27 పాము పిల్లలను గుర్తించి అటవీశాఖకు సమాచారం
- వాటిని సురక్షితంగా పట్టుకుని అడవిలో వదిలిపెట్టిన అధికారులు
- విషం లేని నీటి పాములని గుర్తించిన అధికారులు
గ్రామానికి చెందిన ఒక ఇంట్లో నీటి సరఫరాలో అంతరాయం కలగడంతో, కుటుంబ సభ్యులు వాటర్ ట్యాంక్ను పరిశీలించేందుకు దాని మూత తెరిచారు. అయితే, ట్యాంకు లోపల గుంపుగా ఉన్న చిన్న చిన్న పాము పిల్లలను గమనించి వారు దిగ్భ్రాంతికి గురయ్యారు. వెంటనే అప్రమత్తమైన బాధితులు అటవీశాఖ అధికారులకు సమాచారం అందించారు.
సమాచారం అందుకున్న రేంజ్ ఆఫీసర్ శిశ్పాల్ సింగ్, స్నేక్ క్యాచర్లు తాలిబ్, భోలా హుటాహుటిన ఘటనా స్థలానికి చేరుకున్నారు. ట్యాంక్లో ఉన్న 27 పాము పిల్లలను వారు అత్యంత చాకచక్యంగా బయటకు తీశారు. ఎవరికీ ఎలాంటి ప్రమాదం వాటిల్లకుండా ఈ సహాయక చర్యలను పూర్తి చేశారు. అనంతరం ఆ పాము పిల్లలను సమీపంలోని అటవీ ప్రాంతంలో సురక్షితంగా విడిచిపెట్టారు.
ట్యాంకులో లభ్యమైనవి విషరహితమైన 'చెకర్డ్ కీల్బ్యాక్' (ఆసియా నీటి పాము) జాతికి చెందిన పిల్లలని అధికారులు గుర్తించారు. ఇవి సాధారణంగా నీటి వనరుల సమీపంలో నివసిస్తాయని వారు తెలిపారు. ఈ రెస్క్యూ ఆపరేషన్కు సంబంధించిన వీడియోలు ప్రస్తుతం సామాజిక మాధ్యమాల్లో వైరల్ గా మారాయి. ఇలాంటి ఘటనలు ఎదురైనప్పుడు స్వయంగా ప్రయత్నించకుండా వెంటనే అటవీశాఖకు సమాచారం అందించాలని, అలాగే వాటర్ ట్యాంకులను ఎప్పటికప్పుడు తనిఖీ చేసుకోవాలని అటవీశాఖ అధికారులు ప్రజలకు సూచించారు.
