డీజే టిల్లు దర్శకుడి నుంచి 'అనుమాన పక్షి'.. నవ్వులు పూయిస్తున్న టీజర్!

‘డీజే టిల్లు’ చిత్రంతో టాలీవుడ్‌లో సంచలన విజయం సాధించిన దర్శకుడు విమల్ కృష్ణ తన కొత్త చిత్రంతో ప్రేక్షకుల ముందుకు వస్తున్నారు. రాగ్ మయూర్ హీరోగా ఆయన దర్శకత్వంలో తెరకెక్కుతున్న 'అనుమాన పక్షి' సినిమా టీజర్‌ను చిత్రబృందం తాజాగా విడుదల చేసింది. ఈ టీజర్ సినిమాపై ఆసక్తిని అమాంతం పెంచేసింది.

టీజర్ చూస్తుంటే ఇదొక పారనోయిడ్ రొమాంటిక్ కామెడీ ఎంటర్‌టైనర్ అని స్పష్టంగా తెలుస్తోంది. ప్రతి చిన్న విషయాన్ని అతిగా ఆలోచిస్తూ, అనుమానంతో రచ్చ చేసే యువకుడి పాత్రలో రాగ్ మయూర్ అదరగొట్టారు. ముఖ్యంగా పెళ్లి నేపథ్యంలో సాగే సన్నివేశాల్లో హీరో ప్రవర్తన వల్ల తలెత్తే గందరగోళం, కామెడీ హైలైట్‌గా నిలుస్తోంది. "కశ్మీర్ నుంచి ఫోన్‌లు వస్తున్నాయి.. ఇప్పుడేం చేయాలి?" వంటి పంచ్ డైలాగ్‌లు ప్రేక్షకులను ఆకట్టుకుంటున్నాయి.

ఈ చిత్రంలో రాగ్ మయూర్ సరసన మెరిన్ ఫిలిప్ హీరోయిన్‌గా నటిస్తుండగా, సీనియర్ నటి రాశీ, ప్రిన్స్ సిసిల్, బ్రహ్మాజీ కీలక పాత్రలు పోషిస్తున్నారు. శ్రీచరణ్ పాకాల సంగీతం అందిస్తున్నారు. చిలక ప్రొడక్షన్స్ పతాకంపై రాజీవ్ చిలక, రాజేష్ జగిత్యాని, హీరాచంద్ దండ్ ఈ చిత్రాన్ని నిర్మిస్తున్నారు.
వినోదభరితంగా సాగిన ఈ టీజర్ సినిమాపై మంచి అంచనాలను నెలకొల్పింది. ఈ చిత్రాన్ని జులై 10న ప్రపంచవ్యాప్తంగా థియేటర్లలో విడుదల చేయనున్నట్లు మేకర్స్ ప్రకటించారు.