చాట్‌జీపీటీలో మీ ప్రశ్నకు.. ఎంత నీరు ఖర్చవుతుందో తెలుసా?

కృత్రిమ మేధ (ఏఐ) సాంకేతికత ప్రపంచవ్యాప్తంగా విప్లవాత్మక మార్పులకు నాంది పలుకుతున్నప్పటికీ, దాని వెనుక పెను పర్యావరణ ముప్పు పొంచి ఉందని పలు నివేదికలు హెచ్చరిస్తున్నాయి. ముఖ్యంగా, చాట్‌జీపీటీ వంటి 'ఏఐ' సాధనాలు పనిచేయడానికి అవసరమైన డేటా సెంటర్లు ప్రతిరోజూ కోట్ల లీటర్ల మంచినీటిని వినియోగిస్తున్నాయి. తాజా అంచనాల ప్రకారం, కేవలం చాట్‌జీపీటీ నిర్వహణ కోసమే రోజుకు సుమారు 148 మిలియన్ లీటర్ల నీరు అవసరమవుతోంది. ఒక చిన్న సమాధానం ఇవ్వడానికే ఒక వాటర్ బాటిల్ అంత నీరు ఖర్చవుతుంది.

ఎందుకింత నీరు అవసరం?

'ఏఐ' అప్లికేషన్లు పనిచేసే క్రమంలో వాటి సర్వర్లు విపరీతమైన ఉష్ణాన్ని విడుదల చేస్తాయి. ఈ సర్వర్లను నిరంతరం చల్లబరచడానికి 'ఎవాపరేటివ్ కూలింగ్ సిస్టమ్‌'ను వినియోగిస్తారు. దీనికి భారీ మొత్తంలో నీరు అవసరమవుతుంది. ఇది ప్రత్యక్ష వినియోగం కాగా, ఈ డేటా సెంటర్లకు అవసరమైన విద్యుత్ ఉత్పత్తిలోనూ పరోక్షంగా నీటి వినియోగం జరుగుతోంది. కాలిఫోర్నియా విశ్వవిద్యాలయం పరిశోధకులు 2023లో చేపట్టిన అధ్యయనం ప్రకారం, చాట్‌జీపీటీలో 5 నుంచి 50 ప్రశ్నలకు సుమారు 100 పదాలలో సమాధానం పొందడానికి దాదాపు 519 మిల్లీలీటర్ల నీరు ఖర్చవుతోందని వెల్లడైంది.

పెరుగుతున్న ఆందోళనలు

అమెరికాలో ఒక్క 2023లోనే డేటా సెంటర్లు 17 బిలియన్ గ్యాలన్ల నీటిని వినియోగించాయి. కొన్ని భారీ డేటా సెంటర్లు రోజుకు 5 మిలియన్ గ్యాలన్ల నీటిని వాడుతున్నాయి. ఇది ఒక చిన్న పట్టణం నీటి అవసరాలతో సమానం. 2030 నాటికి 'ఏఐ' సంబంధిత నీటి వినియోగం ట్రిలియన్ల లీటర్లకు చేరవచ్చని ఐక్యరాజ్యసమితి నివేదిక హెచ్చరించింది.

ఈ ప్రభావం క్షేత్రస్థాయిలో ఇప్పటికే స్పష్టంగా కనిపిస్తోంది. అమెరికాలోని పలు రాష్ట్రాల్లో వ్యవసాయ అవసరాలను కాదని డేటా సెంటర్లకు ప్రాధాన్యత ఇవ్వడంపై రైతులు, స్థానికుల నుంచి నిరసనలు వ్యక్తమవుతున్నాయి. నీటి కొరత ఉన్న ప్రాంతాల్లో ఈ సమస్య మరింత తీవ్రంగా మారుతోంది. 

దీనిపై స్పందించిన టెక్ సంస్థలు, తాము నీటిని ఆదా చేసే అధునాతన కూలింగ్ టెక్నాలజీలను అభివృద్ధి చేస్తున్నామని, 'వాటర్ పాజిటివ్' లక్ష్యంతో పనిచేస్తున్నామని చెబుతున్నాయి. అయితే, అసలు వినియోగంపై పూర్తిస్థాయి పారదర్శకత లేదని నిపుణులు అభిప్రాయపడుతున్నారు. 'ఏఐ' ఆవిష్కరణలు, సహజ వనరుల సంరక్షణ మధ్య సమతుల్యతను సాధించడమే ప్రస్తుత ప్రపంచం ముందున్న అతిపెద్ద సవాలు.