ఈడెన్‌లో ఢిల్లీ బ్యాటర్ల జోరు.. కేకేఆర్ ముందు భారీ టార్గెట్

ఇండియన్ ప్రీమియర్ లీగ్ 2026లో భాగంగా కోల్‌కతా నైట్ రైడర్స్‌తో జరుగుతున్న మ్యాచ్‌లో ఢిల్లీ క్యాపిటల్స్ బ్యాటర్లు అదరగొట్టారు. సొంత మైదానం ఈడెన్ గార్డెన్స్‌లో టాస్ గెలిచి బౌలింగ్ ఎంచుకున్న కేకేఆర్‌కు ఢిల్లీ బ్యాటర్లు చుక్కలు చూపించారు. నిర్ణీత 20 ఓవర్లలో 5 వికెట్ల నష్టానికి 203 పరుగుల భారీ స్కోరు సాధించారు. దీంతో కోల్‌కతా ముందు 204 పరుగుల కఠినమైన లక్ష్యాన్ని నిర్దేశించారు.

ఢిల్లీ ఇన్నింగ్స్‌లో వికెట్ కీపర్ బ్యాటర్ కేఎల్ రాహుల్ విధ్వంసకర ఇన్నింగ్స్ ఆడాడు. కేవలం 30 బంతుల్లో 5 ఫోర్లు, 4 సిక్సర్లతో 60 పరుగులు చేసి జట్టుకు బలమైన పునాది వేశాడు. అతనికి కెప్టెన్ అక్షర్ పటేల్ (25 బంతుల్లో 39), డేవిడ్ మిల్లర్ (19 బంతుల్లో 28) తోడయ్యారు. ఆఖర్లో అశుతోష్ శర్మ (11 బంతుల్లో 18 నాటౌట్) వేగంగా పరుగులు సాధించడంతో ఢిల్లీ స్కోరు 200 దాటింది.

కేకేఆర్ బౌలర్లలో సౌరభ్ దూబే ఆకట్టుకున్నాడు. 4 ఓవర్లలో 28 పరుగులు మాత్రమే ఇచ్చి 2 కీలక వికెట్లు పడగొట్టాడు. సునీల్ నరైన్, వరుణ్ చక్రవర్తి, అనుకుల్ రాయ్ తలా ఒక వికెట్ తీశారు. అయితే, కార్తీక్ త్యాగి 4 ఓవర్లలో 55 పరుగులు సమర్పించుకున్నాడు.