Jagan: వివేకా హత్యోదంతం: ఘటనా స్థలంలో దొరికిన లేఖలో ఏమని రాశారో వెల్లడించిన కడప ఎస్పీ
- అన్నికోణాల్లో దర్యాప్తు
- లేఖను వివేకా కుటుంబ సభ్యులే అందించారు
- మీడియాకు వెల్లడించిన రాహుల్ దేవ్ శర్మ
వైఎస్సార్సీపీ నేత వైఎస్ వివేకానందరెడ్డి మృతి వ్యవహారం అనేక మలుపులు తిరుగుతోంది. మొదట గుండెపోటుగా తెరపైకి వచ్చిన ఈ వ్యవహారం పోస్టుమార్టం తర్వాత హత్య అని తేలింది. అంతలోనే, వివేకా రాసినట్టుగా పేర్కొంటున్న ఓ లేఖ తెరపైకి వచ్చింది. దాన్ని తమకు అందించింది వివేకా కుటుంబ సభ్యులేనని చెబుతున్నారు కడప జిల్లా ఎస్పీ రాహుల్ దేవ్ శర్మ. వివేకా హత్య గురించి మీడియాతో మాట్లాడుతూ, అన్ని కోణాల్లో దర్యాప్తు కొనసాగుతోందని తెలిపారు. ఆ లేఖను పరిశీలించామని, పెన్ తో లెటర్ రాసినట్టు తెలుస్తోందని అన్నారు.
ఆ లేఖపై రక్తపు మరకలు ఉన్నాయని చెప్పిన ఆయన... "డ్రైవర్ ను త్వరగా రమ్మని పిలిచాను... అందుకే నన్ను చంపబోతున్నాడు" అని ఆ లేఖలో ఉందంటూ వెల్లడించారు.. ఈ లేఖపై పూర్తిస్థాయిలో విచారణ జరుపుతున్నాం అంటూ స్పష్టం చేశారు. ఈ లేఖలో డ్రైవర్ పేరును ప్రస్తావించడం కుట్రలో భాగం అని ఏపీ ప్రతిపక్ష నేత వైఎస్ జగన్ ఆరోపించారు. తన చిన్నాన్న మృతి వ్యవహారాన్ని తప్పుదోవ పట్టించేందుకే డ్రైవర్ పేరును తీసుకువచ్చారని మండిపడ్డారు. రక్తపు గాయాలతో ఉన్న తన చిన్నాన్న హంతకులు చూస్తుండగా ఆ లేఖను ఎలా రాయగలడని జగన్ ప్రశ్నించారు.
