‘ఫేస్ బుక్’ ఖాతాను ప్రారంభించిన పవన్ కల్యాణ్

జనసేన పార్టీ అధ్యక్షుడు పవన్ కళ్యాణ్ ప్రముఖ సామాజిక మాధ్యమం ఫేస్ బుక్ లోకి అడుగుపెట్టారు. హైదరాబాద్ లోని జనసేన పార్టీ కార్యాలయంలో ‘ఫేస్ బుక్’ లో పవన్ తన అధికారిక పేజీని ప్రారంభించారు. ఈ మేరకు ‘జనసేన’ ఓ ప్రకటన విడుదల చేసింది. జనసైనికులు, యువతీయువకులు, ప్రజలకు మరింత చేరువవుతున్నారని, ఈ పేజీ ద్వారా పార్టీ సిద్ధాంతాలు, తన ఆలోచనలను పంచుకుంటారని, పార్టీ కార్యక్రమాలను కూడా తెలియజేస్తారని అన్నారు. ఈ పేజీలో తొలి పోస్ట్ గా తూర్పు గోదావరి జిల్లా పర్యటనకు సంబంధించిన అప్ డేట్ పోస్ట్ చేశారని, నవంబర్ 2 వ తేదీన విజయవాడ నుంచి తుని పట్టణానికి రైలులో చేరుకుంటున్నట్లు తెలిపారని, అందులో భాగంగా కొన్ని స్టేషన్లలో వివిధ వర్గాల ప్రతినిధులను కలుసుకుంటారని పవన్ చెప్పినట్టు ఆ ప్రకటనలో పేర్కొంది.
'సేనానితో రైలు ప్రయాణం'

జన్మభూమి రైలులో 'సేనానితో రైలు ప్రయాణం' పేరుతో పవన్ కల్యాణ్ ప్రయాణించనున్నారని జనసేన పార్టీ పేర్కొంది. ఈ ప్రయాణంలో పలు వర్గాల ప్రతినిధులు పవన్ కళ్యాణ్ తో మాట్లాడతారని పేర్కొంది. విజయవాడ నుంచి తుని చేరుకొనే వరకూ పలు వర్గాల ప్రజలతో మాటామంతీ ఉంటుందని, మధ్యాహ్నం 1.20 గంటలకు రైల్వే పోర్టర్లతో మాట్లాడతారని తెలిపింది. ఆ తర్వాత మామిడి రైతులు, అసంఘటిత రంగంలో ఉన్న చిరు వ్యాపారులు, రైల్వే వెండర్లతో పాటు, రైలులోని ప్రయాణికులు, చెరకు రైతులు, చేనేత కార్మికులు, విద్యార్థులు, ఏటికొప్పాక బొమ్మల తయారీ కళాకారులతో ఈ ప్రయాణంలో పవన్ మాట్లాడతారని పేర్కొంది.