: 'బాహుబలి-2' కోసం వేయి కళ్లతో ఎదురుచూస్తున్న పాకిస్థానీలు
భారతీయ సినిమాలకు పాకిస్థాన్ లో ఉండే క్రేజ్ అంతా ఇంతా కాదు. బాలీవుడ్ సినిమాలు అక్కడ రెగ్యులర్ గా రీలీజ్ అవుతుంటాయి. తాజాగా సంచలనం విజయం అందుకున్న 'బాహుబలి-2' సినిమా కోసం అక్కడి సినీ అభిమానులు వేయికళ్లతో ఎదురుచూస్తున్నారు. ఈ చిత్రాన్ని తమ దేశంలో కూడా విడుదల చేయాలంటూ సోషల్ మీడియా వేదికగా వారు కోరుతున్నారు. మరోవైపు, ఈ సినిమాను రిలీజ్ చేయడానికి బాహుబలి నిర్మాతలు కూడా ఉత్సుకతతో ఉన్నారని సమాచారం.
కాకపోతే భారతీయ సినిమాల రిలీజ్ పై పాక్ సెన్సార్ బోర్డు కట్టుదిట్టంగా వ్యవహరిస్తుంటుంది. హిందుత్వాన్ని ప్రమోట్ చేసే సినిమాలకు అక్కడి సెన్సార్ బోర్డు దాదాపు గ్రీన్ సిగ్నల్ ఇవ్వదు. ఈ కారణంగానే సల్మాన్ ఖాన్ నటించిన 'బజరంగీ భాయీజాన్' సినిమాపై పాకిస్థాన్ బ్యాన్ విధించింది. ఇక 'బాహుబలి-2' విషయానికి వస్తే... హిందూ దేవుళ్లకు సంబంధించిన కొన్ని సన్నివేశాలు ఈ చిత్రంలో ఉన్నాయి. ఈ నేపథ్యంలో, ఈ సినిమాపై అక్కడి సెన్సార్ బోర్డు ఏ విధంగా స్పందిస్తుందో వేచి చూడాలి. ఒకవేళ గ్రీన్ సిగ్నల్ వస్తే... దాయాది దేశంలో కూడా మన తెలుగు సినిమా విశ్వరూపం చూపించడం ఖాయం.
