: మెట్రోరైలు ప్రాజెక్టు పిల్లర్ విరిగిపోయినట్లు ఉన్న ఫోటో మనది కాదు, ఆ ప్రచారాన్ని నమ్మొద్దు: కేటీఆర్
హైదరాబాద్‌లో ప్ర‌తిష్టాత్మ‌కంగా చేప‌ట్టిన మెట్రోరైలు ప్రాజెక్టులో అధికారులు నిర్ల‌క్ష్యంగా వ్య‌వ‌హ‌రిస్తున్నారంటూ, గచ్చిబౌలి సమీపంలో మెట్రోరైలుకి చెందిన ఓ పిల్లర్ విరిగిపోయి ప్రమాదకర స్థితిలో ఉందంటూ సామాజిక మ‌ద్య‌మాల్లో వ‌స్తోన్న ఆరోప‌ణ‌ల‌పై తెలంగాణ మంత్రి కేటీఆర్ స్పందించారు. ఓ పిల్లర్ విరిగిపోయినట్లు ఉన్న ఓ ఫోటో ఆన్‌లైన్‌లో హ‌ల్‌చ‌ల్ చేసింది. అయితే, ఆ ఫోటో హైదరాబాద్ మెట్రో రైలు ప్రాజెక్టుకి సంబంధించింది కాద‌ని ఆయ‌న స్ప‌ష్టం చేశారు. ఆ ఫోటో పీవీ ఎక్స్ ప్రెస్ హైవేకు సంబంధించిన ఫ్లైఓవర్ పిల్లర్‌ది కూడా కాద‌ని ఆయ‌న ట్విట్ట‌ర్‌లో పేర్కొన్నారు. ఆన్‌లైన్‌లో క‌నిపిస్తోన్న ఆ ఫోటో పాకిస్థాన్ రావల్పిండికి చెందినదని కేటీఆర్ తెలిపారు. రావ‌ల్పిండిలో మెట్రో స్థితిని తెలుపుతూ ఓ వార్తా సంస్థ ప్ర‌చురించిన న్యూస్‌లో ఆ ఫోటో ఉన్న అంశాన్ని గురించి తెలిపే లింకును కేటీఆర్ ఈ సంద‌ర్భంగా షేర్ చేశారు. ప్ర‌జ‌లు ఇటువంటి వదంతులు నమ్మొద్దని ఆయ‌న పేర్కొన్నారు. సామాజిక మాధ్యమాల‌ను అస్త్రంగా చేసుకొని జ‌రుగుతోన్న ప్రచారాల పట్ల ప్ర‌జ‌లు అప్రమత్తంగా ఉండాలని కేటీఆర్ అన్నారు.
This is not in Hyderabad neither in Metro nor in PVNR. Actually it's in Rawalpindi, Pakistanhttps://t.co/q8wilsOq0T https://t.co/WKGrXmn8rf
— KTR (@KTRTRS) 3 August 2016
