: కృష్ణా జిల్లాలోనూ వైసీపీ ఖాళీ?... ముగ్గురు ఎమ్మెల్యేలు సిద్ధంగా ఉన్నారంటున్న జిల్లా టీడీపీ అధ్యక్షుడు!
ఏపీలో అధికార పార్టీ టీడీపీ చేపట్టిన ‘ఆపరేషన్ ఆకర్ష్’కు విపక్ష వైసీపీ విలవిల్లాడుతోంది. వైసీపీ టికెట్లపై విజయం సాధించిన 20 మంది ఎమ్మెల్యేలు ఇప్పటికే ఆ పార్టీని వీడి టీడీపీలో చేరిపోయారు. ఈ నేపథ్యంలో పార్టీ ఎమ్మెల్యేలను కాపాడుకునేందుకు వైసీపీ అధినేత వైఎస్ జగన్ మోహన్ రెడ్డి నానా తంటాలు పడుతున్నారన్న వార్తలు వినవస్తున్నాయి. కర్నూలు, ప్రకాశం, నెల్లూరు, విశాఖ తదితర జిల్లాల్లో మొన్నటిదాకా కాస్తంత బలంగా కనిపించిన వైసీపీ ప్రస్తుతం బలహీనపడిపోయింది. ఇక పశ్చిమ గోదావరి లాంటి జిల్లాల్లో టీడీపీ బలం ముందు వైసీపీ ఏమాత్రం తూగలేని పరిస్థితిలో ఉంది. తాజాగా మరో కీలక జిల్లా... కృష్ణా జిల్లాలోనూ వైసీపీ మరింత బలహీనపడే ప్రమాదం లేకపోలేదు. ఈ మేరకు ఆ జిల్లా టీడీపీ అధ్యక్షుడు బచ్చుల అర్జునుడు నిన్న సంచలన ప్రకటన చేశారు. జిల్లాలోని నూజివీడులో పర్యటించిన సందర్భంగా నిన్న అర్జునుడు సంచలన ప్రకటన చేశారు. జిల్లాలోని వైసీపీ ఎమ్మెల్యేల్లో ముగ్గురు ఎమ్మెల్యేలు పార్టీ మారేందుకు సిద్ధంగా ఉన్నారని ఆయన పేర్కొన్నారు. వీరిలో నూజివీడు ఎమ్మెల్యే కూడా ఉన్నారని అర్జునుడు వైసీపీకి డేంజర్ బెల్స్ మోగించారు. గడచిన ఎన్నికల్లో వైసీపీకి ఈ జిల్లాలో ఐదు అసెంబ్లీ సీట్లు దక్కాయి. విజయవాడ వెస్ట్ నియోజకవర్గం నుంచి గెలిచిన జలీల్ ఖాన్ ఇప్పటికే టీడీపీలో చేరిపోయారు. వెరసి ఆ జిల్లాలో వైసీపీ ఎమ్మెల్యేలు నలుగురు మాత్రమే ఉన్నారు. బచ్చుల అర్జునుడు చెప్పిన ప్రకారం ముగ్గురు ఎమ్మెల్యేలు టీడీపీలో చేరితే... సింగిల్ ఎమ్మెల్యే మాత్రమే ఆ పార్టీలో ఉంటారు. ఆయన చెబుతున్న దాని ప్రకారం జిల్లాలోని తిరువూరు, నూజివీడు, పామర్రు ఎమ్మెల్యేలుగా ఉన్న రక్షణ నిధి, మేకా ప్రతాప్ అప్పారావు, ఉప్పులేటి కల్పనలు పార్టీ మారేందుకు సిద్ధంగా ఉన్నట్లు తెలుస్తోంది. ఈ క్రమంలో ఇప్పటకే వీరు పలు డిమాండ్లను టీడీపీ ముందు పెట్టారట. ప్రస్తుతం వీటిపై చర్చలు జరుగుతున్నాయని, త్వరలోనే ముగ్గురు వైసీపీ ఎమ్మెల్యేలు తమ పార్టీలో చేరడం ఖాయమేనని అర్జునుడు చెప్పుకొచ్చారు. ఇదే జరిగితే... ప్రస్తుతం జిల్లాలో టీడీపీకి ఎదురొడ్డి పోరు సాగిస్తున్న గుడివాడ ఎమ్మెల్యే కొడాలి శ్రీవెంకటేశ్వరరావు (కొడాలి నాని) మాత్రమే వైసీపీకి మిగులుతారు.
