: నిలబడే కునుకు తీసిన జింబాబ్వే దేశాధ్యక్షుడు!
జపాన్ పర్యటనలో ఉన్న జింబాబ్వే అధ్యక్షుడు రాబర్ట్ ముగాబే నిలబడే చిన్న కునుకు తీసినట్లు వార్తలు హల్ చల్ చేస్తున్నాయి. ఆఫ్రికా అభివృద్ధి కోసం ప్రతి ఏడాది నిర్వహించే టోక్యో అంతర్జాతీయ సదస్సు ఈ ఏడాది ఆగస్టులో కెన్యాలో జరగనుంది. ఈ నేపథ్యంలో జపాన్, జింబాబ్వే దేశాల మధ్య ద్వైపాక్షిక ఒప్పందాల గురించి వివరించేందుకుగాను జపాన్ ప్రధాని షింజో అబే ఆహ్వానం మేరకు ఆయన జపాన్ పర్యటనకు వెళ్లారు. ఈ సందర్భంగా నిర్వహించిన మీడియా సమావేశంలో ఇరు దేశాల దౌత్య సంబంధాల బలోపేతం గురించి షింజో అబే మాట్లాడారు. ముగాబే గురించి షింజో మాట్లాడుతున్న సమయంలో... ఆయన నిద్రావస్థలో ఉన్నట్లు వీడియోల ద్వారా తెలుస్తోంది. కాగా, ఈ సంఘటనపై జింబాబ్వే సమాచార మంత్రిత్వ శాఖ స్పందిస్తూ, ముగాబే నిద్రపోవడం కాదని, ద్వైపాక్షిక ఒప్పందాల గురించి ఆయన కళ్లు మూసుకుని ఆలోచిస్తున్నారంటూ ఒక ప్రకటన విడుదల చేసింది.
