: ఆనంద గజపతిరాజు అంతిమ యాత్ర ప్రారంభం... 6 గంటలకు అంత్యక్రియలు
మాజీ ఎంపీ ఆనంద గజపతిరాజు అంతిమ యాత్ర ప్రారంభమైంది. విజయనగరంలోని ఆయన నివాసం నుంచి మయూరి కూడలి మీదుగా కోట వరకు అంతిమ యాత్ర చేపట్టారు. కోట సమీపంలో సాయంత్రం 6 గంటలకు ఆయన అంత్యక్రియలను అధికార లాంఛనాలతో నిర్వహించనున్నారు. అనారోగ్యం కారణంగా ఆయన ఈరోజు ఉదయం విశాఖలోని మణిపాల్ ఆసుపత్రిలో తుది శ్వాస విడిచారు. విజయనగర రాజ వంశానికి చెందిన ఆనంద గజపతిరాజు... ప్రస్తుతం కేంద్ర పౌరవిమానయాన శాఖ మంత్రిగా ఉన్న టీడీపీ సీనియర్ నేత అశోక్ గజపతిరాజుకు స్వయానా సోదరుడు. గతంలో లోక్ సభ సభ్యుడి(ఎంపీ)గానే కాక మంత్రిగానూ ఆనంద గజపతిరాజు పనిచేశారు. ప్రస్తుతం సింహాచలంలోని శ్రీ లక్ష్మీనరసింహస్వామి ఆలయ ధర్మకర్తగా ఉన్న ఆనంద గజపతిరాజు కొంతకాలంగా అనారోగ్యంతో బాధపడుతున్నారు. ఈ క్రమంలో కొంతకాలంగా చికిత్స తీసుకుంటున్న ఆయన ఈరోజు ఉదయం కన్నుమూశారు.
