: హర్యానాలో హింసాత్మకంగా జాట్ ల ఆందోళన... పోలీసుల కాల్పుల్లో ఒకరు మృతి
ఓబీసీ రిజర్వేషన్ల కోసం ఆరు రోజుల నుంచి హర్యానాలో జాట్ లు చేస్తున్న పోరాటం ఇవాళ హింసకు దారి తీసింది. అక్కడి రోహతక్ ప్రాంత సమీపంలో ఆందోళనకారులపై పోలీసులు కాల్పులు జరపడంతో ఒకరు మరణించారు. 9 మంది గాయపడ్డారు. దాంతో రెచ్చిపోయిన ఆందోళనకారులు పోలీసుల వాహనాలను తగలబెట్టారు. మరోవైపు రోహతక్ లో ఆ రాష్ట్ర మంత్రి కెప్టెన్ అభిమన్యు ఇంటిపై దాడి చేసి నిప్పు పెట్టారు. ఈ సమయంలో ఇంట్లో ఎవరూ లేరు. అంతేగాక అక్కడి మహర్షి దయానంద్ యూనివర్సిటీ పరిసరాల్లో మరో ఇంటికి కూడా నిప్పుపెట్టడంతో పరిస్థితి అదుపుతప్పింది. ఈ క్రమంలోనే పోలీసులు కాల్పులు జరపాల్సి వచ్చింది. మరోవైపు రవాణా వ్యవస్థ స్తంభించగా, రాష్ట్ర వ్యాప్తంగా మొబైల్ ఇంటర్నెట్ సేవలను నిలిపివేశారు. దాంతో ఇవాళ హర్యానా సీఎం మనోహర్ లాల్ ఖట్టర్ అఖిలపక్ష నేతలతో సమావేశం నిర్వహించి జాట్ల రిజర్వేషన్లపై చర్చించారు.
