: ఉద్యోగులకు కేంద్రం బంపర్ ఆఫర్... సెలవులిచ్చి ‘యాత్ర’లకు పోయిరమ్మంటున్న వైనం

---

అవును, కేంద్ర ప్రభుత్వ ఉద్యోగులకు నరేంద్ర మోదీ సర్కార్ బంపర్ ఆఫర్ ప్రకటించింది. ‘అడవులకు వెళ్లండి...సాహస యాత్రలు చేయండి’ అంటూ ప్రభుత్వం ఉద్యోగులను ఊరిస్తోంది. ట్రెక్కింగ్, పర్వతారోహణ, ఎడారి యాత్ర, పడవ ప్రయాణం తదితరాలకు వెళ్లిరండని కేంద్ర సిబ్బంది, శిక్షణ వ్యవహారాల శాఖ ఈ మేరకు ఉద్యోగులకు సర్క్యులర్ జారీ చేసింది. ఇందుకోసం సెలవుతో పాటు రూ.20 వేల నగదు కూడా ఇస్తామని ఆ శాఖ ఉద్యోగులకు ఆఫరిచ్చింది. అయినా సెలవులిచ్చి, డబ్బులిచ్చి యాత్రలు చేయమని ప్రభుత్వం ఎందుకు చెబుతుందో తెలుసా? వృత్తి జీవితంలో ఒత్తిడిని జయించి , సవాళ్లను ఎదుర్కొనేలా ఉద్యోగుల్లో నూతనోత్తేజాన్ని నింపేందుకేనట. ఇప్పటికే కార్పొరేట్ కంపెనీలు ఈ తరహా వినూత్న ఆఫర్లను తమ ఉద్యోగులకు ఇస్తున్నాయి. తాజాగా ప్రభుత్వం కూడా కార్పొరేట్ సంస్థల తరహాలోనే తమ ఉద్యోగులను రీచార్జి చేసేందుకు ఈ వినూత్న చర్యకు శ్రీకారం చుట్టింది. సాహస యాత్రలకు వెళ్లి వచ్చే ఉద్యోగులు ఆరోగ్యంగానూ ఉంటారని, తద్వారా సెలవులు కూడా తక్కువగా తీసుకుంటారని మోదీ ప్రభుత్వం లెక్కలేస్తోంది.