: బాలచందర్ పేరిట ట్రస్టు ప్రకటించిన కుటుంబ సభ్యులు
దివంగత దర్శకుడు కె.బాలచందర్ పేరిట ఓ ట్రస్టును స్థాపిస్తున్నట్టు ఆయన కుటుంబ సభ్యులు ప్రకటించారు. ఆ ట్రస్టు ద్వారా బాలచందర్ స్మారకార్థం అనేక సేవా కార్యక్రమాలు నిర్వహిస్తామని తెలిపారు. తొలుత, అర్హులైన సినీ కార్మికుల పిల్లలకు స్కాలర్షిప్ లు అందిస్తామని ఓ ప్రకటనలో పేర్కొన్నారు. ప్రతి ఏడాది జులై 9న బాలచందర్ జన్మదినోత్సవాన్ని పురస్కరించుకుని థియేటర్, సినిమా, టీవీ రంగాల్లో అవార్డులిస్తామని వివరించారు. అంతేగాకుండా, కె.బాలచందర్ అవార్డు ఏర్పాటు చేసి, అద్భుత ప్రతిభ చూపిన విజువల్ కమ్యూనికేషన్స్ విభాగం విద్యార్థులకు ప్రదానం చేస్తామని తెలిపారు. బాలచందర్ సతీమణి రాజం ఈ ట్రస్టును నడిపిస్తారని, కుమార్తె పుష్ప, కుమారుడు ప్రసన్న, కోడలు గీత, అల్లుడు కందస్వామి, ఫిలింమేకర్ వసంత్ సాయి ట్రస్టు సభ్యులుగా ఉంటారని ఆ ప్రకటనలో వివరించారు.
