: కొత్త ఐడియాలు కావాలంటున్న మోదీ

---

కేంద్ర బడ్జెట్ ప్రవేశపెట్టేందుకు ఎన్డీఏ సర్కారు కసరత్తులు చేస్తోంది. అధికారంలోకి వచ్చిన తరువాత పూర్తిస్థాయిలో ప్రవేశపెడుతున్న బడ్జెట్ కావడంతో దీనిపై అన్ని వర్గాలు ఆసక్తిగా ఎదురుచూస్తున్నాయి. దీంతో, బడ్జెట్ ను వినూత్నంగా రూపొందించాలని ప్రధాని నరేంద్ర మోదీ భావిస్తున్నారు. మంత్రివర్గ సహచరులకు ఈ దిశగా స్పష్టమైన ఆదేశాలు జారీ చేశారు. మూసధోరణిలో పోకుండా, సరికొత్త ఐడియాలతో ముందుకు రావాలని వారికి సూచించారు. ఆ ఆలోచనలు సామాన్యుడి అవసరాలు, ఆలోచనా ధోరణిని ప్రతిబింబించేలా ఉండాలని చెప్పారు. బడ్జెట్ పై ఆన్ లైన్లో ప్రజల అభిప్రాయాలు తీసుకోవాలని మంత్రులకు స్పష్టం చేశారు. ప్రతిష్ఠాత్మక 'స్వచ్ఛ భారత్' కార్యక్రమం కూడా ప్రజల నుంచి తీసుకున్న అభిప్రాయాల ఫలితంగానే రూపుదిద్దుకున్నదని ఈ సందర్భంగా ప్రధాని తెలిపారు. ఇక, బడ్జెట్ లో కేటాయించే నిధులను ఖర్చు చేయడంపై నిశిత పరిశీలన అవసరమని నొక్కి చెప్పిన మోదీ, ఏడాది పొడవునా సమానంగా నిధులను ఖర్చు చేయాలంటూ మంత్రులకు సూచించారు.