: అనుకున్నట్లుగానే ఐఫోన్ 6 వచ్చేసింది!
అందరి అంచనాలను యాపిల్ నిజం చేసింది. ఏ ఒక్కరినీ నిరాశకు గురి చేయరాదని భావించిన తన పాత సంప్రదాయం ప్రకారం తన కొత్త ఉత్పత్తిని మంగళవారం విడుదల చేసింది. ఐఫోన్ 6 పేరిట కొత్త మొబైల్ ఫోన్ ను యాపిల్ ఆవిష్కరించింది. అంతేకాక తాను ఇప్పటిదాకా విడుదల చేసిన ఐఫోన్ లన్నింటిలోకీ ఐఫోన్ 6 అత్యున్నతమైనదని గర్వంగా ప్రకటించింది. ఐఫోన్ 6, ఐఫోన్ 6 ప్లస్ పేరిట రెండు వెర్షన్లలో విడుదలైన రెండు ఐఫోన్లు ఈ ఏడాది చివరి నాటికి ప్రపంచంలోని అన్ని దేశాల మార్కెట్లనూ ముంచెత్తనున్నాయి. అమెరికాలో మాత్రం ఈ నెల 19 నుంచి వినియోగదారులకు తమ కొత్త ఉత్పత్తులను అందుబాటులోకి తేనున్నట్లు యాపిల్ సీీఐఓ టిమ్ కుక్ వెల్లడించారు. అమెరికాలోని కుపర్టినిలో కిక్కిరిసిన విలేకరుల సమావేశంలో ఐఫోన్ 6, 6 ప్లస్ లను విడుదల చేసిన టిమ్ కుక్, ఐవాచ్ ను కూడా విడుదల చేశారు. అమెరికాలో ఐఫోన్ 6 ధర 199 డాలర్ల నుంచి ఫ్రారంభం కానుండగా, ఐఫోన్ 6 ప్లస్ ధర 299 డాలర్ల నుంచి ప్రారంభం కానుంది. ఇక కొత్త ఉత్పత్తి ఐవాచ్ ధరను మాత్రం యాపిల్ వెల్లడించలేదు. మరోవైపు భారత మార్కెట్ లోకి కొత్త ఐఫోన్ లతో పాటు ఐవాచ్ కూడా ఈ నెల 26ననే అందుబాటులోకి రానున్నాయని వార్తలు వస్తున్నప్పటికీ కంపెనీ వర్గాలు మాత్రం దీనిపై పెదవి విప్పలేదు. ప్రపంచ మొబైల్ వినియోగదారులను నెలల తరబడి వేచి చూసేలా చేసిన ఐఫోన్ 6 స్క్రీన్ 4.7 అంగుళాలు, ఐఫోన్ 6 ప్లస్ స్క్రీన్ 5.5 అంగుళాలుగా ఉంది. ఇప్పటిదాకా అందుబాటులోకి వచ్చిన ఐఫోన్లన్నింటిలోకి ఐఫోన్ 6 అతి పలుచగా ఉండటంతో వినియోగదారులను విశేషంగా ఆకట్టుకుంటోంది.
