: తెలంగాణలో కాంగ్రెస్ ముఖ్యమంత్రి అభ్యర్థి ఎవరు?
తెలంగాణ కాంగ్రెస్ పార్టీలో గతంలో ఎప్పుడూ లేని చర్చ జోరుగా సాగుతోంది. తెలంగాణలో ముఖ్యమంత్రి పదవిని ఓటర్లకు ఎరగా వేస్తూ అన్ని పార్టీలు దూసుకుపోతున్నాయి. దళితుడ్ని ముఖ్యమంత్రిని చేస్తానని కేసీఆర్ ప్రకటించగా, కేకే ధృవీకరించారు. టీడీపీ బీసీ ముఖ్యమంత్రి అంటూ మరో అస్త్రం ప్రయోగించింది. తెలంగాణ తొలి ముఖ్యమంత్రి పదవిపై ఎన్నో ఆశలు పెట్టుకున్న తెలంగాణ కాంగ్రెస్ సీనియర్ నేతలకు, ఆ పార్టీ ఉపాధ్యక్షుడు రాహుల్ గాంధీ ఝలకిచ్చారు. తెలంగాణకు ముఖ్యమంత్రిగా మహిళను చూడాలని ఉందని అన్నారు.
దీంతో తెలంగాణ కాంగ్రెస్ సీనియర్ నేతలకు గుండె జారి గల్లంతయ్యింది. దీంతో గీతారెడ్డి, డీకే అరుణ, జయసుధ, సునీత లక్ష్మారెడ్డి, విజయశాంతిలలో కొత్త ఆశలు చిగురించాయి. రాహుల్ రాక తెలంగాణ కాంగ్రెస్ లో కొత్త అలజడి రేపింది. దీంతో ముఖ్యమంత్రి అభ్యర్థి ఎవరనే చర్చ జోరుగా ఆ పార్టీలో కొనసాగుతోంది.
