: సినీ ఫక్కీలో ఏఎస్సై దుర్మరణం
వాహనాలు తనిఖీ చేస్తున్న ఓ ఏఎస్సై సినీ ఫక్కీలో దుర్మరణం పాలయ్యాడు. వివరాల్లోకెళితే.. కృష్ణా జిల్లా పామర్రు మండలం కనుమూరు వద్ద వాహనాల తనిఖీ కోసం పోలీసులు ఓ చెక్ పోస్టును ఏర్పాటు చేశారు. ఈ ఉదయం అక్కడ వాహనాల తనిఖీలో ఏఎస్సై ప్రసాద్ పాల్గొన్నాడు. పండ్ల లోడుతో వచ్చిన ఓ వ్యాన్ ను ఆపమని సూచించాడు. కానీ, ఆ వ్యాన్ డ్రైవర్ తన వాహనాన్ని ఆపకుండా ముందుకు వెళ్ళేందుకు యత్నించాడు. ఏఎస్పై ఆ వాహనాన్ని అడ్డగించేందుకు సిద్ధపడుతుండగా.. వ్యాన్ డ్రైవర్ వేగంగా నడిపి ఏఎస్సైను ఢీకొట్టి ఆగకుండా వెళ్ళిపోయాడు. తలకు తీవ్రగాయం కావడంతో ప్రసాద్ ను ఆసుపత్రికి తరలిస్తుండగానే ప్రాణాలు విడిచాడు. ఏఎస్సై కుటుంబాన్ని పరామర్శించిన జిల్లా ఎస్పీ ప్రభాకరరావు రూ.5 లక్షల పరిహారం ప్రకటించారు.
