Bollywood: 'ఇలాగేనా సినిమా తీసేది?' అంటూ థియేటర్‌లో దర్శకుడిని పట్టుకుని తిట్టి.. కన్నీరు పెట్టుకున్న అమ్మాయి.. వీడియో వైరల్

కశ్మీర్‌లో గతంలో పండిట్ కుటుంబాలు ఎదుర్కొన్న పరిస్థితుల ఆధారంగా బాలీవుడ్ దర్శకుడు విధు వినోద్ చోప్రా ‘శిఖర’ అనే సినిమాను తీశారు. రెండు రోజుల క్రితం విడుదలైన ఈ సినిమా పట్ల ఓ వర్గం నుంచి విమర్శలు ఎదురవుతున్నాయి. ఈ సినిమా చూస్తూ భావోద్వేగానికి గురైన ఓ యువతి.. దర్శకుడిపై విరుచుకుపడిన దృశ్యాలు మీడియాకు లభ్యమయ్యాయి.  

కశ్మీర్ పండిట్ కుటుంబానికి చెందిన ఓ అమ్మాయి ఇటీవల ఢిల్లీలోని ఓ థియేటర్‌ ఈ సినిమా చూడడానికి వెళ్లింది. అదే సినిమా థియేటర్‌లో దర్శకుడు వినోద్ చోప్రా కూడా కూర్చొని సినిమా చూస్తున్నారు. సినిమా ప్రదర్శన కొనసాగుతుండగా ఆ యువతి లేచి నిలబడి దర్శకుడిని తిట్టింది.

ఈ సినిమాను డబ్బు కోసమే తీశారని, 1990లో కశ్మీర్ పండిట్లు ఆ ప్రాంతం విడిచి వెళ్లిపోవడానికి గల కారణాలను చూపలేదని అరుస్తూ చెప్పింది. సామూహిక అత్యాచారాలు, హత్యల గురించి చూపలేదని వాపోయింది. కశ్మీర్‌ పండిట్లపై జరిగిన మారణహోమాన్ని కొంచెం కూడా చూపలేదని చెప్పింది. ఓ వర్గానికి అనుకూలంగా ఈ సినిమా తీసినట్లు ఉందని ఆరోపించింది. ఇలాగేనా సినిమా తీసేది? అంటూ నిలదీసి, ఆ తర్వాత తన సీటులో కూర్చొని కన్నీరు పెట్టుకుంది.

దీంతో వినోద్ చోప్రా స్పందించారు. ఆ యువతి కోసమే తాను ఈ సినిమా సీక్వెల్ ను తీస్తానని చెప్పాడు. ఒకే విషయంపై భిన్న అభిప్రాయాలు వ్యక్తమవడం సహజమేనని తెలిపారు. ఈ సినిమా ఈ నెల 7న విడుదలై, మిశ్రమ స్పందనను రాబట్టింది. ఈ సినిమా విడుదలకు ముందు కూడా అనేక వివాదాల్లో చిక్కుకుంది.