Anushka: ఐదు భాషల్లో ఏప్రిల్ 2న విడుదలవుతున్న 'నిశ్శబ్దం'

నాయిక ప్రాధాన్యత కలిగిన పాత్రలకు అనుష్క పెట్టింది పేరు. కథా భారాన్ని మొత్తం తన భుజాలపై వేసుకుని నడిపించగల సమర్థురాలు ఆమె. 'అరుంధతి' .. 'రుద్రమదేవి' .. 'భాగమతి' వంటి చిత్రాల ద్వారా ఆమె ఈ విషయాన్ని నిరూపించింది. ఆమె తాజా చిత్రంగా 'నిశ్శబ్దం' రూపొందింది. హేమంత్ మధుకర్ దర్శకత్వం వహించిన ఈ సినిమాలో ఆమె మూగ .. వినికిడి లోపం కలిగిన చిత్రకారిణి పాత్రలో కనిపించనుంది.

టీజీ విశ్వప్రసాద్ - కోన వెంకట్ కలిసి నిర్మించిన ఈ సినిమా, ప్రస్తుతం పోస్ట్ ప్రొడక్షన్ పనులను జరుపుకుంటోంది. తెలుగుతో పాటు తమిళ .. మలయాళ .. హిందీ .. ఇంగ్లిష్ భాషల్లో ఏప్రిల్ 2వ తేదీన ఈ సినిమాను విడుదల చేయనున్నారు. గోపీసుందర్ సంగీతాన్ని అందించిన ఈ సినిమాలో మాధవన్ .. అంజలి .. షాలినీ పాండే .. అవసరాల శ్రీనివాస్ .. మైఖేల్ ఇతర ముఖ్య పాత్రల్లో కనిపించనున్నారు. అనుష్క కెరియర్లో చెప్పుకోదగిన చిత్రాల జాబితాలో ఈ సినిమా కూడా చేరిపోవడం ఖాయమనే అభిప్రాయాన్ని అభిమానులు వ్యక్తం చేస్తున్నారు.