Corona Virus: చైనా నుంచి వచ్చిన ఒకే కుటుంబానికి చెందిన ఐదుగురికి కరోనా లక్షణాలు... గాంధీ ఆసుపత్రిలో చేరిక

చైనాలో విజృంభించిన కరోనా వైరస్ ఇప్పుడు ఇతర దేశాల్లోనూ ప్రమాద ఘంటికలు మోగిస్తోంది. థాయ్ లాండ్, హాంకాంగ్ లలోనూ కరోనా పీడితుల సంఖ్య క్రమంగా పెరుగుతోంది. భారత్ లో సైతం ఈ మహమ్మారి బారినపడి అనేకమంది ఆసుపత్రుల్లో చేరుతున్నారు.

ఇటీవలే చైనా నుంచి వచ్చిన ఒకే కుటుంబానికి చెందిన ఐదుగురికి కరోనా వైరస్ సోకినట్టు భావిస్తున్నారు. ప్రస్తుతం ఈ కుటుంబం సికింద్రాబాద్ గాంధీ ఆసుపత్రిలో చేరింది. కరోనా లక్షణాలతో వీరు ఆసుపత్రికి వచ్చారని అక్కడి డాక్టర్లు వెల్లడించారు. ఇప్పటివరకు కరోనా లక్షణాలతో గాంధీ ఆసుపత్రికి వచ్చిన బాధితుల సంఖ్య 10కి చేరింది. ఈ ఉదయమే ఓ యువతి కేరళ నుంచి రాగా, ఆమెకు కరోనా లక్షణాలున్నట్టు అనుమానిస్తున్నారు. ఆమె కూడా గాంధీ ఆసుపత్రిలో చేరింది.