ISRO: వ్యోమగాముల కంటే ముందు 'వ్యోమమిత్ర'ను అంతరిక్షంలోకి పంపుతున్న ఇస్రో

అంతరిక్షంలోకి భారతీయులను పంపేందుకు మన అంతరిక్ష పరిశోధన సంస్థ ఇస్రో వడివడిగా అడుగులు వేస్తున్న సంగతి తెలిసిందే. 2022లో గగన్ యాన్ మిషన్ ద్వారా ముగ్గురు వ్యోమగాములను ఇస్రో అంతరిక్షంలోకి పంపబోతోంది. ఈ ముగ్గురు వ్యోమగాములను ఇండియన్ ఎయిర్ ఫోర్స్ నుంచి ఎంపిక చేశారు. వీరికి రష్యాలోని అంతరిక్ష కేంద్రంలో అవసరమైన శిక్షణను ఇవ్వనున్నారు. గగన్ యాన్ కు ఎంపికైన ముగ్గురు వ్యోమగాములు పురుషులే కావడం గమనార్హం.

అయితే ఈ ముగ్గురి కంటే ఓ ముందుగా ఓ మహిళను ఇస్రో అంతరిక్షంలోకి పంపనుంది. ఆమె పేరు 'వ్యోమమిత్ర'. అయితే, ఇది ఓ మహిళా హ్యూమనోయిడ్ రోబో కావడం విశేషం. వ్యోమగాములను అంతరిక్షంలోకి పంపడం కంటే ముందే... ఈ వ్యోమమిత్రను నింగిలోకి పంపనుంది. గగన్ యాన్ లో భాగంగానే... ఈ ఏడాది చివర్లో ఈ మిషన్ ను ఇస్రో చేపట్టనుంది. ఈ మిషన్ ద్వారా వ్యోమగాములను అంతరిక్షంలోకి పంపడమే కాకుండా... వారిని సురక్షితంగా మళ్లీ భూమిపైకి తీసుకొచ్చే ప్రయోగాన్ని ఇస్రో పరీక్షించనుంది. ఏదేమైనప్పటకీ, భారత్ తరపున అంతరిక్షంలోకి వెళ్తున్న తొలి వ్యోమగామిగా వ్యోమమిత్ర రికార్డు పుటలకు ఎక్కనుంది.