Ram Gopal Varma: 'ముప్పావలా' సినిమాపై రామ్ గోపాల్ వర్మ వివరణ

సంచలనాలకు కేరాఫ్ అడ్రస్ అయిన సినీ దర్శకుడు రామ్ గోపాల్ వర్మ తెరకెక్కించిన 'అమ్మ రాజ్యంలో కడప బిడ్డలు' చిత్రం వివాదాస్పదమైన సంగతి తెలిసిందే. ఆ సినిమా ఎలా ఆడిందన్న సంగతి అటుంచితే... దానికి సంబంధించి జరిగిన రచ్చ మాత్రం అంతాఇంతా కాదు. ఈ నేపథ్యంలో, వర్మ నెక్స్ట్ మూవీ ఏమిటనే దానిపై ఆసక్తి నెలకొంది. మరోసారి మరో వివాదాస్పద అంశాన్నే వర్మ ఎంపిక చేసుకుంటాడనేది చాలా మంది భావన.

ఇది నిజమే అన్నట్టుగా... ఆయన పేరిట ఓ ట్వీట్ వైరల్ అయింది. తన కొత్త సినిమాను ప్రకటిస్తుండటం తనకు చాలా సంతోషంగా ఉందంటూ ఆయన పేరిట ట్వీట్ వచ్చింది. తన తదుపరి చిత్రం 'ముప్పావలా' అంటూ ఓ పోస్టర్ షేర్ చేశారు. జనసేన అధినేత పవన్ కల్యాణ్ కథాంశంతో సినిమా వస్తున్నట్టు పోస్టర్ చాలా క్లియర్ గా ఉంది. ఇది సంచలనంగా మారింది.

ఈ క్రమంలో, దీనిపై రామ్ గోపాల్ వర్మ స్పందించారు. ఆ ట్వీట్ తనది కాదని ట్విట్టర్ ద్వారా తెలిపారు. మార్ఫింగ్ చేసిన ఇమేజ్ తో దాన్ని ఎవరో పోస్ట్ చేశారని... దాన్ని పట్టించుకోవాల్సిన అవసరం తనకు లేదని చెప్పారు. కావాలనుకుంటే ఎవరైనా సరే తన ట్వీట్ హిస్టరీని చెక్ చేసుకోవచ్చని తెలిపారు.