PAY TM: పేటీఎం నుంచి 'కేవైసీ' మెసేజ్ వచ్చిందా?... దయచేసి నమ్మవద్దంటూ సీఈఓ అర్జంట్ మెసేజ్!

తమ పేటీఎం సంస్థ పేరిట ఓ నకిలీ సందేశం వస్తోందని, కొన్ని లక్షల మందికి ఇది చేరిందని, దయచేసి దీన్ని నమ్మవద్దని సంస్థ సీఈఓ విజయ్ శేఖర్ శర్మ తన ట్విట్టర్ ఖాతాలో ఓ అత్యవసర సందేశాన్ని పోస్ట్ చేశారు. ఇది ఓ కేవైసీ స్కామ్ అని, దీన్ని నమ్మరాదని అన్నారు. కేవైసీ వివరాలను వెంటనే అందించి, కింద ఉన్న లింక్ ను క్లిక్ చేసి యాప్ ను డౌన్ లోడ్ చేసుకోకుంటే, ఖాతా నిలిచిపోతుందన్న సమాచారం కొన్ని లక్షల మందికి వెళ్లడంతో, ఈ వ్యవహారంపై స్పందించిన విజయ్ శేఖర్, కస్టమర్లను అలర్ట్ చేశారు.

పేటీఎం ఎన్నడూ ఇటువంటి వివరాలను అడగబోదని ఆయన స్పష్టం చేశారు. ఏ విధమైన యాప్ లను డౌన్ లోడ్ చేసుకోవాలని కూడా తాము సూచించబోమని తెలిపారు. బహుమతుల మాయలో పడవద్దని సూచించారు. ఖాతా వివరాలను హ్యాక్ చేసేందుకు మోసగాళ్లు చేస్తున్న పని ఇదని, దీనిపై తాము ఇప్పటికే ఫిర్యాదు చేశామని అన్నారు.