అరుదైన గౌరవం.. స్టేడియంలోని స్టాండుకు గంభీర్ పేరు

టీమిండియా మాజీ ఓపెనర్, బీజేపీ ఎంపీ గౌతమ్ గంభీర్ కు అరుదైన గౌరవం దక్కింది. ఢిల్లీలోని అరుణ్ జైట్లీ క్రికెట్ స్టేడియంలోని ఓ స్టాండ్ కు ఆయన పేరును పెట్టనున్నారు. ఈ సందర్భంగా ఢిల్లీ డిస్ట్రిక్ట్ క్రికెట్ అసోసియేషన్ (డీడీసీఏ) సంయుక్త కార్యదర్శి రాజన్ మంచండా మాట్లాడుతూ, దేశ క్రికెట్ కు గంభీర్ చేసిన సేవలకు ఈ విధంగా కృతజ్ఞతలు తెలపాలని నిర్ణయించామని చెప్పారు. అపెక్స్ కౌన్సిల్ కూడా ఈ నిర్ణయానికి ఆమోదముద్ర వేసిందని తెలిపారు.

వాస్తవానికి స్టేడియంలోని ఓ స్టాండ్ కు గంభీర్ పేరు పెట్టాలనే ప్రతిపాదన ఎప్పటి నుంచో ఉందని.... దానికి సంబంధించిన ఏర్పాట్లు ఇప్పటికి పూర్తయ్యాయని రాజన్ మంచండా చెప్పారు. వచ్చే రంజీ సీజన్ నుంచి ఈ స్టాండ్ అందుబాటులోకి వస్తుందని తెలిపారు. ఇప్పటికే ఈ స్టాండ్ లో ఓ స్టాండ్ కి టీమిండియా కెప్టెన్ విరాట్ కోహ్లీ పేరు పెట్టారు. ఇప్పుడు గంభీర్ కు అలాంటి గౌరవమే దక్కనుంది.