Vijay: రెండు రోజుల్లోనే 100 కోట్ల క్లబ్ లోకి చేరిపోయిన 'బిగిల్'

తమిళనాట మాస్ హీరోగా విజయ్ కి ఒక రేంజ్ లో క్రేజ్ వుంది. ఎప్పటికప్పుడు ఆయన తన సినిమా వసూళ్లతో పాటు క్రేజ్ ను కూడా పెంచుకుంటూ వెళుతున్నాడు. దీపావళి కానుకగా ఈ నెల 25న విడుదలైన 'బిగిల్' కూడా అదే తరహాలో తన జోరు చూపిస్తోంది. రెండు రోజుల్లోనే ఈ సినిమా 100 కోట్ల క్లబ్ లోకి చేరిపోయింది.

ప్రపంచవ్యాప్తంగా రెండు రోజుల్లోనే ఈ సినిమా 120 కోట్లను రాబట్టడం విశేషం. ఇంతకుముందు విజయ్ చేసిన 'సర్కార్' రెండు రోజుల్లో 100 కోట్లను సాధించగా, 'బిగిల్' ఆ మార్కును క్రాస్ చేసి ఆశ్చర్యచకితులను చేసింది. తెలుగు రాష్ట్రాల్లో 3 రోజుల్లో 10 కోట్లకి పైగా వసూలు చేసిన ఈ సినిమా, ఓవర్సీస్ లోను అదే దూకుడు చూపుతోంది. ఈ రోజు నుంచి ఈ సినిమాకి లభించే ఆదరణను బట్టి, సినిమా ఏ స్థాయి విజయాన్ని అందుకోనుందనేది తెలుస్తుంది.