Suryapet District: ఇది ఆషామాషీ గెలుపు కాదు..హుజూర్ నగర్ ప్రజలకు ధన్యవాదాలు: సీఎం కేసీఆర్

హుజూర్ నగర్ ఉపఎన్నికల్లో టీఆర్ఎస్ కు అద్భుత విజయాన్ని అందించిన నియోజకవర్గ ప్రజలకు ధన్యవాదాలు తెలియజేస్తున్నానని సీఎం కేసీఆర్ అన్నారు. తెలంగాణభవన్ లో ఈరోజు నిర్వహించిన విలేకరుల సమావేశంలో ఆయన మాట్లాడుతూ, ఈ గెలుపు ఆషామాషీ గెలుపు కాదని, ప్రజలు ఆలోచించి ఓట్లు వేశారని అన్నారు. ప్రజల కోసం పాటుపడుతున్న ప్రభుత్వానికి ఈ గెలుపు ఓ టానిక్ లాంటిదని, ఉత్సాహాన్ని ఇచ్చిందని చెప్పారు. హుజూర్ నగర్ ఉపఎన్నికలకు ముందు నిర్వహించాల్సిన సభకు తాను హాజరుకాలేకపోయానని గుర్తుచేసుకున్నారు. ఇంత అద్భుత విజయాన్ని అందించిన ప్రజల కోసం ఎల్లుండి హుజూర్ నగర్ లో కృతజ్ఞత సభ నిర్వహిస్తామని అన్నారు.