Marathi actor: 17 ఏళ్ల అమ్మాయిపై లైంగిక వేధింపులు.. మరాఠీ నటుడి అరెస్ట్
- ఈ నెల 23నే నిందితుడిని అరెస్ట్ చేసిన పోలీసులు
- బాలికతో బలవంతంగా బికినీ తొడిగించి ఫొటోలు
- పోలీసులకు ఫిర్యాదు చేసిన బాలిక తల్లి
17 ఏళ్ల అమ్మాయిపై లైంగిక వేధింపుల కేసులో 24 ఏళ్ల మరాఠీ నటుడు, దర్శకుడు మందర్ కుల్‌కర్ణిని పూణె పోలీసులు అరెస్ట్ చేశారు. అతడిని ఈ నెల 23నే అరెస్ట్ చేసినట్టు పోలీసులు తాజాగా వెల్లడించారు. థియేటర్ వర్క్‌షాప్స్ నిర్వహించే కులకర్ణి ఓ వర్క్‌షాప్‌లో బాధిత బాలికను కలిశాడు. ఈ నెల 16న ఆమెను తన అపార్ట్‌మెంట్‌‌కు పిలిచాడు.
ఆమెకు నటించే అవకాశం కల్పిస్తానని చెప్పి ఓ డ్రెస్ ఇచ్చి ధరించమని చెప్పాడు. అనంతరం ఆ డ్రెస్‌లో ఆమె ఫొటోలు తీసుకున్నాడు. ఆ తర్వాత బికినీ ఇచ్చి దానిని వేసుకోవాల్సిందిగా కోరాడు. అందుకు ఆమె నిరాకరించడంతో గతంలో తాను తీసిన ఇతర అమ్మాయిల ఫొటోలు చూపించాడు. దీంతో ఆమె ఆ డ్రెస్ ధరించి ఫొటోలకు పోజిచ్చింది. అనంతరం ఇంటికెళ్లిన బాలిక విషయాన్ని తన తల్లితో చెప్పగా, ఆమె పోలీసులకు ఫిర్యాదు చేసింది. కేసు నమోదు చేసుకున్న పోలీసులు నిందితుడిని అరెస్ట్ చేశారు. కేసు దర్యాప్తులో ఉందని తెలిపారు.
