USA: అమెరికాకు చైనా మొబైల్ దిగ్గజం హువావే కౌంటర్.. సొంతంగా ఆపరేటింగ్ సిస్టమ్ రూపకల్పన!

ఐక్యరాజ్యసమితి ఆంక్షలను కాదని ఇరాన్ కు సాంకేతిక సహకారం అందిస్తున్నారన్న ఆరోపణలతో అగ్రరాజ్యం అమెరికా చైనా కంపెనీ హువావేపై కొరడా ఝుళిపించింది. హువావే ఉత్పత్తులకు సేవలను ఆపేయాలని తమ కంపెనీలను ఆదేశించింది. ఈ నేపథ్యంలో అమెరికా చర్యకు దీటుగా బదులు ఇచ్చేందుకు చైనా కంపెనీ సిద్ధమయింది. తాజాగా  గూగుల్ అందించే ఆండ్రాయిడ్ ఓఎస్ కు ప్రత్యామ్నాయంగా ‘హాంగ్ మెంగ్ ఓఎస్’ను అభివృద్ధి చేసినట్లు హువావే తెలిపింది. ఈ ఓఎస్ ఆండ్రాయిడ్ కంటే 60 శాతం వేగంగా పనిచేస్తుందని వెల్లడించింది.

ప్రస్తుతం ఓఎస్ తుది పరీక్షలు కొనసాగుతున్నాయనీ, ఈ ఏడాది అక్టోబర్ కల్లా అన్ని హువావే ఉత్పత్తులకు ‘హాంగ్ మెంగ్ ఓఎస్’ ను అందుబాటులోకి తీసుకొస్తామని పేర్కొంది. ఈ ఏడాది ఆగస్టు తర్వాత తమ ఫోన్లలో గూగుల్ ఆండ్రాయిడ్ సేవలు లభించవని స్పష్టం చేసింది. దాదాపు 22.50 కోట్ల మొబైల్ ఫోన్లలో ఈ కొత్త సాఫ్ట్ వేర్ ను ఇన్ స్టాల్ చేయనున్నారు. మరోవైపు వివో, ఒప్పో కంపెనీలు ఈ ఓఎస్ ను పరీక్షించేందుకు తమ బృందాలను పంపినట్లు విశ్వసనీయవర్గాలు తెలిపాయి. మరోవైపు ఈ హాంగ్ మెంట్ ఓఎస్ ట్రేడ్ మార్కు కోసం హువావే కంపెనీ ప్రపంచవ్యాప్తంగా 9 దేశాలతో పాటు యూరప్ లో దరఖాస్తు చేసింది.