Telangana: మైనర్ బాలికను వేధించిన ఎమ్మెల్యే జీవన్ రెడ్డి అనుచరుడు.. అరెస్ట్ చేసిన పోలీసులు!

కట్టుకున్న భార్య ఉండగానే ఓ వ్యక్తి అడ్డదారులు తొక్కాడు. పెళ్లి చేసుకుంటాననీ, తనను ప్రేమించాలని ఓ మైనర్ బాలిక వెంటపడటం మొదలుపెట్టాడు. అయితే ఇందుకు యువతి నిరాకరించడంతో వేధింపులు తీవ్రతరం చేశాడు. చివరికి బాధితురాలు పోలీసులను ఆశ్రయించడంతో అరెస్ట్ అయి ఊచలు లెక్కపెడుతున్నాడు. తెలంగాణలోని నిజామాబాద్ జిల్లాలో ఈ ఘటన చోటుచేసుకుంది.

జిల్లాలోని ఆర్మూర్ కార్పొరేటర్ లత భర్త శ్రీనివాస్ గత కొంతకాలంగా ఇదే ప్రాంతానికి చెందిన యువతిని వేధిస్తున్నాడు. టీఆర్ఎస్ నేత, ఆర్మూర్ ఎమ్మెల్యే జీవన్ రెడ్డి అనుచరుడైన శ్రీనివాస్ పెళ్లి చేసుకోవాలని ఆ బాలిక వెంటపడటం మొదలుపెట్టాడు. యువతి తల్లిదండ్రులు మందలించినా ఆయన ప్రవర్తన మార్చుకోలేదు. చివరికి ఈ వేధింపులు హద్దు దాటడంతో తల్లిదండ్రుల సాయంతో బాలిక ఆర్మూర్ పోలీసులకు ఫిర్యాదు చేసింది. దీంతో శ్రీనివాస్ పై పోక్సో చట్టం కింద కేసు నమోదుచేసిన పోలీసులు, నిందితుడిని అరెస్ట్ చేశారు.