Crime News: ఇంజనీర్‌ అయినా డాక్టర్‌గా వేషం...అమ్మాయిలకు వల వేసి మోసం!
- డేటింగ్‌ యాప్‌లో యువతులతో చాటింగ్‌
- ఫొటోలు సేకరించి బ్లాక్‌మెయిల్‌తో డబ్బు డిమాండ్‌
- విషయం వెల్లడి కావడంతో కటకటాల వెనక్కి
డేటింగ్‌ యాప్‌ ద్వారా యువతులతో పరిచయం పెంచుకుని డబ్బుకోసం వారినే బ్లాక్‌మెయిల్‌ చేస్తున్న ఓ యువ ఇంజనీర్‌ని పోలీసులు పట్టుకుని కటకటాల వెనక్కిపంపారు. కొన్నాళ్లుగా ఇతని బెదిరింపులు, బ్లాక్‌మెయిల్‌ను భరించిన ఓ యువతి చివరికి విసిగిపోయి ధైర్యంగా పోలీసులను ఆశ్రయించడంతో నిందితుడి పాపం పండింది.
సైబరాబాద్‌ క్రైం పోలీసుల కథనం మేరకు వివరాల్లోకి వెళితే...కర్నూల్‌ జిల్లా కేంద్రంలోని లక్ష్మీనగర్‌కు చెందిన గొల్లాదొడ్డి అబ్దుల్లా (35) వృత్తిరీత్యా ఇంజనీర్‌. హైదరాబాద్‌ కూకట్‌పల్లిలోని ఓ ప్రైవేటు సంస్థలో పనిచేస్తున్నాడు. ఓ డేటింగ్‌ యాప్‌లో డాక్టర్ కార్తీక్‌రెడ్డిగా తన పేరును నమోదు చేసుకున్నాడు. నగరంలోని ఓ ప్రముఖ ఆసుపత్రిలో అనెస్థటిస్ట్ (మత్తు ఇచ్చే డాక్టర్)గా పనిచేస్తున్నట్లు పేర్కొన్నాడు.
నాలుగేళ్ల క్రితం ఓ యువతితో యాప్‌లో ఇతనికి పరిచయం అయింది. అప్పటికి వైద్య విద్య అభ్యసిస్తున్న ఆమెతో అబ్దుల్లా తరచూ చాటింగ్‌ చేసేవాడు. కొన్నాళ్ల తరువాత ఇద్దరూ బయట కలుసుకునే వారు. ఆ సందర్భంలో తీసిన ఫొటోలు, వీడియోలు అబ్దుల్లా భద్రపరిచాడు.
కొన్నాళ్ల తర్వాత ఆ యువతికి పెళ్లయి పోవడంతో తనతో చాటింగ్‌ చేయడం మానేయాలని కోరింది. ఇదే అవకాశంగా తీసుకున్న అబ్దుల్లా ఆ ఫొటోలు, వీడియోలు చూపి ఆమెను బెదిరించడం మొదలుపెట్టాడు. తాను అడిగినంత మొత్తం ఇవ్వకుంటే ఆ ఫొటోలు, వీడియోలు నీ భర్తకు పంపిస్తానని, సామాజిక మాధ్యమాల్లో పోస్టు చేస్తానని బెదిరించడం మొదలుపెట్టాడు. ఈ క్రమంలో ఆమె వద్ద నుంచి పలు దఫాల్లో 4 లక్షల రూపాయలు తీసుకున్నాడు.
అయినా వేధింపులు కొనసాగిస్తుండడంతో భరించలేని ఆమె సైబరాబాద్‌ సైబర్‌ క్రైం పోలీసులను ఆశ్రయించింది. దర్యాప్తు ప్రారంభించిన పోలీసులు, అబ్దుల్లా లీలలు తెలుసుకుని నోరెళ్లబెట్టారు. దీంతో మణికొండలోని పుప్పాలగూడలో ఉంటున్న అబ్దుల్లాను అరెస్టు చేసి కటాకటాల వెనక్కి పంపారు.
