Social Media: నా కూతుర్ని పెళ్లి చేసుకుంటే రూ.2 కోట్లు ఇస్తా.. థాయ్ మిలియనీర్ బంపర్ ఆఫర్

థాయ్ లాండ్ కు చెందిన అర్డోన్ రొడాంగ్ అనే కోటీశ్వరుడు ఓ సంచలన ప్రకటనతో ప్రపంచం దృష్టిని ఆకర్షించాడు. 58 ఏళ్ల రొడాంగ్ థాయ్ లాండ్ లో ప్రముఖ పండ్ల రైతుగా, వ్యాపారిగా పేరుగాంచాడు. తన కుమార్తెను చేసుకున్న వాళ్లకు రూ.2 కోట్లు ఇస్తానంటూ సోషల్ మీడియాలో ప్రకటన ఇచ్చాడు. ఇంతకీ ఆ ప్రకటనలో ఏముందో చూడండి!

"నా కుమార్తె కర్న్ సిటా వయసు 26 సంవత్సరాలు. ఆమెకు ఇప్పటివరకు బాయ్ ఫ్రెండ్స్ ఎవరూ లేరు. నా కూతురికి పెళ్లి చేయాలని ఎన్నో సంబంధాలు చూసినా ఆమెకు ఎవరూ నచ్చడంలేదు. అందుకే ఈ ప్రకటన ఇవ్వాల్సి వచ్చింది. మీలో ఎవరైనా నా కూతుర్ని పెళ్లి చేసుకుంటే రూ.2 కోట్ల నజరానాతో పాటు నా వ్యాపారంలో భాగస్వామిగా చేసుకుంటాను. అబ్బాయి ఎంత చదివాడన్నది మాకు ముఖ్యంకాదు. కష్టపడే మనిషై ఉండాలి. భార్యను శ్రద్ధగా చూసుకోవాలి. ఏ దేశం వాళ్లయినా నో ప్రాబ్లం... ఆసక్తి ఉంటే సంప్రదించండి" అంటూ సోషల్ మీడియాలో పోస్ట్ పెట్టాడు.

సాధారణంగా థాయ్ లాండ్ లో కట్నం ఇచ్చే సంప్రదాయం లేదు. పెళ్లికొడుకే పెళ్లికూతురు తండ్రికి ఎదురు కట్నం ఇవ్వాల్సి ఉంటుంది. అయితే ఈ సంప్రదాయాన్ని కూడా కాదని తానే కట్నం ఇస్తానంటూ రొడాంగ్ సంచలన ప్రకటన చేశాడు. అయితే ఈ విషయం కర్న్ సిటాకు ఫ్రెండ్స్ ద్వారా తెలిసింది. తండ్రి ఇచ్చిన ప్రకటన చూసి దిగ్భ్రాంతికి గురైంది. మొదట అదో జోక్ అనుకున్నానని, కానీ, తండ్రి సీరియస్ నెస్ చూసిన తర్వాత ఆయన నిర్ణయాన్ని అంగీకరిస్తున్నానని తెలిపింది.