Haribabu: వైసీపీ నేత విజయసాయి రెడ్డి ట్వీట్‌కు బీజేపీ ఎంపీ హరిబాబు ఘాటు జవాబు

ఢిల్లీలో ఏపీ ముఖ్యమంత్రి నారా చంద్రబాబునాయుడు చేపట్టిన దీక్ష కోసం ప్రత్యేక విమానంలో వెళ్లిన టీడీపీ నేతలతోపాటు బీజేపీ ఎంపీ హరిబాబు ఉండడంపై వైసీపీ నేత విజయసాయిరెడ్డి దుమ్మెత్తి పోశారు. టీడీపీ-బీజేపీలు బయటకి ఒకరిపై ఒకరు విమర్శలు చేసుకుంటూ లోలోపల మాత్రం ప్రేమాయణం సాగిస్తున్నాయనడానికి ఈ ఫొటో నిదర్శనమంటూ ట్వీట్ చేశారు. వీరి అనైతిక బంధానికి ఇది నిదర్శనమని పేర్కొన్నారు. బీజేపీతో కటీఫ్ అంటూ, బాబు అండ్ కో ఆ పార్టీతో చాటుమాటు కాపురం చేస్తోందంటూ ధ్వజమెత్తారు.
 
విజయసాయి రెడ్డి ట్వీట్‌పై హరిబాబు స్పందించారు. విమానంలో ఏ పార్టీవారైనా ప్రయాణించవచ్చని పేర్కొన్నారు. విశాఖ నుంచి ఢిల్లీకి ఇండిగో విమానంలో వచ్చానన్న ఆయన సహ ప్రయాణికులు ఎవరన్న విషయం తనకు అనవసరమన్నారు. విమానంలో ఏ పార్టీకి చెందినవారైనా ప్రయాణించవచ్చని, ఈ విషయంలో ఎటువంటి నిషేధం లేదని విజయసాయిరెడ్డికి చురక అంటించారు.