YSRCP: పోలీస్ వాళ్లకు కులం ఉండదు.. మాది ఖాకీ కులం!: జగన్ ఆరోపణలపై ఏపీ డీజీపీ స్పందన

ఏపీ సీఎం చంద్రబాబు ఆధ్వర్యంలో డీజీపీ ఠాకూర్ పోలీస్ వ్యవస్థను భ్రష్టు పట్టిస్తున్నారని, సీనియర్లను పక్కన పెట్టి ఠాకూర్ ను డీజీపీగా నియమించారని వైసీపీ అధినేత జగన్ నిన్న ఢిల్లీలో ఆరోపించిన విషయం తెలిసిందే. ఈ నేపథ్యంలో జగన్ చేసిన వ్యాఖ్యలపై ఠాకూర్ స్పందించారు. జగన్ చేసిన ఆరోపణలు మీడియాలో చూశానని, పోలీస్ వాళ్లకు కులం ఉండదని, తమది ఖాకీ కులమని అన్నారు.

హైకోర్టు ఆదేశాల మేరకు మెరిట్ ప్రకారమే పదోన్నతులు ఇచ్చారని, ఈ ఆరోపణలపై ఎన్నికల సంఘం అడిగితే తాను సమాధానమిస్తానని అన్నారు. తాను  నిజాయతీగా పని చేస్తున్నానని, అవినీతి నిరోధక శాఖ డీజీగా తన పని తీరేంటో ప్రజలకు తెలుసని ఈ సందర్భంగా ఠాకూర్ గుర్తుచేశారు. కాగా, తనపై దాడి జరిగితే ఎలాంటి విచారణ జరగక ముందే గంట లోపే చంద్రబాబు తరఫున డీజీపీ వకాల్తా పుచ్చుకుని ఆయనకు కొమ్ముకాశారని జగన్ నిన్న ఆరోపించారు.