Congress: అనిల్ అంబానీకి రూ.30 వేల కోట్ల లబ్ధి నేరుగా చేకూర్చారు: రాహుల్ ఆరోపణలు

ఎన్డీఏ పాలనలో పెద్ద ఎత్తున అవినీతి జరిగిందని కాంగ్రెస్ పార్టీ జాతీయ అధ్యక్షుడు రాహుల్ గాంధీ ఆరోపించారు. ఢిల్లీలోని కాన్ స్టిట్యూషన్ క్లబ్ లో ఈరోజు నిర్వహించిన ఎన్డీయేతర పక్షాల సమావేశంలో ఆయన పాల్గొన్నారు. ‘సేవ్ ది నేషన్- సేవ్ డెమోక్రసీ’ పేరిట నిర్వహించిన ఈ సమావేశంలో 25 పార్టీలకు చెందిన నేతలు పాల్గొన్నారు.

ఈ సందర్భంగా రాహుల్ గాంధీ మాట్లాడుతూ, ఎన్డీఏ పాలనలో అనిల్ అంబానీకి రూ.30 వేల కోట్ల లబ్ధి నేరుగా చేకూరిందని ఆరోపించారు. నాలుగున్నరేళ్ళలో బీజేపీ ప్రభుత్వం పూర్తిగా విఫలమైందని విమర్శించారు. ఈవీఎంల విషయమై ఎన్నికల సంఘం అధికారులను సోమవారం కలుస్తామని, ఓ డాక్యుమెంట్ ను వారికి అందజేస్తామని చెప్పారు. ఈవీఎంల పనితీరుపై ప్రజలకు అనేక అనుమానాలు ఉన్న విషయాన్ని ఈ సందర్భంగా రాహుల్ ప్రస్తావించారు. మోదీ ప్రభుత్వ హయాంలో వ్యవస్థలు నిర్వీర్యమయ్యాయని దుమ్మెత్తిపోశారు.