Andhra Pradesh: అగ్రిగోల్డ్ ఎఫెక్ట్.. మనస్తాపంతో ప్రాణాలు కోల్పోయిన ఏజెంట్!

ఆంధ్రప్రదేశ్ లో అగ్రిగోల్డ్ వ్యవహారం తీవ్ర చర్చకు దారి తీస్తోంది. ఏపీ ప్రభుత్వం అగ్రిగోల్డ్ ఆస్తుల విషయంలో హైకోర్టు మార్గదర్శకాల మేరకు ముందుకు పోతుంటే, ఏపీ ప్రభుత్వం బాధితులను వెంటనే ఆదుకోవాలని ప్రతిపక్షాలు డిమాండ్ చేస్తున్నాయి. ఈ నేపథ్యంలో అగ్రిగోల్డ్ సంస్థలో ఏజెంట్ గా పనిచేసిన ఓ వ్యక్తి ఈరోజు గుండెపోటుతో మృతి చెందారు.

విశాఖపట్నం జిల్లా నాగులపల్లికి చెందిన తాతారావు అగ్రిగోల్డ్ ఏజెంట్ గా పనిచేశారు. అప్పట్లో తనకున్న పరిచయాలతో చాలామంది చేత పెట్టుబడులు పెట్టించారు. చివరికి ఆ సంస్థ చేతులు ఎత్తేయడంతో బాధితులు తాతారావును ప్రశ్నించడం మొదలుపెట్టారు.

ఈ నేపథ్యంలో మనస్తాపానికి లోనైన తాతారావుకు ఈరోజు ఉదయం గుండెపోటు వచ్చింది. కుటుంబ సభ్యులు వెంటనే ఆయన్ను ఆసుపత్రికి తరలించగా, చికిత్స పొందుతూ తాతారావు ప్రాణాలు కోల్పోయారు. ఈ ఘటనపై కేసు నమోదు చేసిన పోలీసులు దర్యాప్తు చేస్తున్నారు.