venkatesh: నేను ఇక్కడే నటన నేర్చుకున్నాను: వెంకటేశ్

వెంకటేశ్ .. వరుణ్ తేజ్ కథానాయకులుగా దర్శకుడు అనిల్ రావిపూడి 'ఎఫ్ 2' సినిమాను రూపొందించాడు. తమన్నా .. మెహ్రీన్ కథానాయికలుగా నటించిన ఈ సినిమాను సంక్రాంతి కానుకగా జనవరి 12వ తేదీన విడుదల చేయనున్నారు. ఈ నేపథ్యంలో నిన్న రాత్రి విశాఖలో ఈ సినిమా ఆడియో వేడుకను నిర్వహించారు.

ఈ వేదికపై వెంకటేశ్ మాట్లాడుతూ .. "వైజాగ్ లో ఈ వేడుక జరుగుతున్నందుకు .. ఇక్కడివారిని మరోసారి కలుసుకున్నందుకు చాలా సంతోషంగా వుంది. నిజం చెప్పాలంటే నేను ఇక్కడే నటన నేర్చుకున్నాను. ఈ సాగరతీరంలోనే 'స్వర్ణకమలం'.. 'మల్లీశ్వరి' సినిమాల షూటింగ్స్ జరిగాయి. 'ఎఫ్ 2' సినిమా చాలా సరదాగా సందడిగా సాగిపోతుంది. 'నువ్వు నాకు నచ్చావ్' .. 'మల్లీశ్వరి' లలో నా కామెడీ టైమింగ్ కి మంచి పేరు వచ్చింది. మళ్లీ అదే కామెడీ టైమింగ్ ఈ సినిమా చూస్తుంటే గుర్తొస్తుంది. ఈ సినిమాతోపాటు సంక్రాంతికి వస్తోన్న బాలకృష్ణ .. చరణ్ .. రజనీ సినిమాలు కూడా బాగా ఆడాలి" అనే అభిప్రాయాన్ని వ్యక్తం చేశారు.